La Tarrancha entama la xira 2011 con delles feches confirmaes

El grupu de mecigayu ska La Tarrancha yá tien confirmaes delles feches p’abril y mayu de la so xira d’esti añu. La banda asturiana va llevar la so música a Santu Adrianu, Cualloto, Xixón, Ciañu y Getxo.
 
Pa calentar motores, esti sábadu tienen previstu ufrir un ensayu públicu n’El Sabil, en Villanouva (Santu Adrianu) a les 23.30 hores, enantes d’abrir la temporada de conciertos nel Tierra Astur de Cualloto’l día 9 d’abril. Yá pal 16 d’abril, La Tarrancha va tar presente nuna de les cites marcaes en collorao nel calendariu musical asturianu: el Conciertu pola Oficialidá. El grupu de mecigayu ska va compartir escenariu con Blima, Toli Morilla, Llangres, La Bandina, Misiva, K-Nalón y La Coḷḷa Propinde.
 
Los asistentes al IX Festival Primeru de Mayu, que tien como sede Ciañu, tamién van poder disfrutar del ska, reggae, folk, ragga y pachanga d’esta banda nuna cita prevista pal domingu 1 de mayu. Yá a finales de mes, el 28 de mayu, La Tarrancha va acudir a un festival que yá vive la so sesta edición y qu’averó la música de dellos grupos asturianos a la xente vasco: la Folixa Asturiana d’Erromo, en Getxo.