La Talá, otru requexu de Llanes amenazáu pola presión urbanística

La Talá, un cachiquín de costa ente Llanes y Poo, teóricamente al abellugu de la declaración de "Paisaxe Protexíu de la Costa Oriental" una declaración que queda en papel moyao énte'l "Plan Parcial de La Talá" una actuación consistente nuna macrourbanización. Colectivos ecoloxistes van retomar la campaña de protesta contra esta actuación urbanística agora que yá se conoz la Declaración d'Impactu Mediuambiental de l'actuación dempués d'asoleyase esta en BOPA.

La Sociedá Española d'Ornitoloxía (SEO/BirdLife) presentare nel so día un recursu estraordinariu énte la Comisión d'Urbanismu y Ordenación del Territoriu (CUOTA) solicitando que se retirare'l Plan Parcial de La Talá, actuación urbanística incluyida nel PXOU de Llanes y que según la prestixosa organización afectaba gravemente a un espaciu litoral de gran valor ecolóxicu y paisaxísticu. La organización conservacionista pidía-y al Principáu d'Asturies l'anulación del Plan Parcial y la redacción de un Plan Especial de Conservación pa caltener los sos valores naturales, llendando la construcción a los suelos que yá se calificaren urbanizable nes normes de 1986.

Agora, el BOPA del 3 d'agostu espublizaba la Declaración d'Impactu Ambiental del Plan Parcial de La Talá. Según los primeros análisis de la Declaración, permitióse-y a la promotora'l nun presentar alternatives de proyectu y l'evaluar "a posteriori" los impactos, en cuantes qu'estos nun se recoyíen nel Estudiu d'Impactu que presentáre la promotora. Presupuestada en cerca de 50.000.000 d'euros la urbanización de La Talá va dexá-y en compensaciones urbanístiques al conceyu llaniscu, una faza onde edificar 50 viviendes.