La Sociedá Ornitolóxica Española pon campamentos de trabayu en Somiedu y Redes

El Principáu d'Asturies y la Sociedá Ornitolóxica Española (SEO) van poner dos campos de trabayu nos parques naturales de Somiedu y Redes col oxetivu de trabayar na recuperación del Faisán Montés.

Los campos de trabayu van facese del 15 al 21 d'agostu nel Parque Natural de Somiedu y del 22 al 28 del mesmu mes nel de Redes y nellos van facese acciones directes de conservación sobre'l faisán o gallu montés, especie catalogada nel llibru encarnáu de los Vertebraos d'España como "vulnerable". La SEO márcase'l doble oxetivu de que les acciones, amás de valir pa recuperar la especie, conciencien a los participantes nos campos de trabayu, turistes y xente que convive col faisán montés.

Los llabores a desarrollar nos campos de trabayu van consistir en llevar a cabu una esperiencia de conservación práctica sobre l'hábitat de la especie,faciendo trabayos de meyora de les árees d'alimentación pa les críes, abriendo güecos y acutando zones ente'l piornu onde los animales puedan desenvolvese.

Los participantes nos campamentos van agospiase n'albergues en réxime de pensión completa de baldre, y los materiales qu'hai que llevar son los que se precisen pa pasar una selmana nel monte (botes, ropa de trabayu y tamién sacu de dormir). La SEO pide que los voluntarios tengan un conocimientu mínimu d'ornitoloxía y que tean avezaos a andar pel monte. Nestos momentos, les places pal campamentu de Redes yá tan completes, pero entovía ye posible apuntase al de Somiedu.