La Sociedá Española d'Ornitoloxía presenta un recursu énte la CUOTA

La Sociedá Española d'Ornitoloxía (SEO/BirdLife) presentó un recursu estraordinariu énte la Comisión d'Urbanismu y Ordenación del Territoriu (CUOTA) solicitando que se retire'l Plan Parcial de La Talá, actuación urbanística incluida en el PXOU de Llanes y que según la prestixosa organización afecta gravemente a un espaciu litoral de gran valor ecolóxicu y paisaxísticu. La organización conservacionista píde-y al Principáu d'Asturies l'anulación del Plan Parcial de La Talá, que prevé la construcción d'una urbanizaciónde xalés nel llugar y la redacción de un Plan Especial de Conservación pa caltener los sos valores naturales, llendando la construcción a los suelos que yá se calificaren urbanizable nes normes de 1986.



El recursu céntrase en motivos mayormente urbanísticos, alegando incumplimientos de la llexislación autonómica, y rescamplando les contradicciones ente mandaos de la mesma CUOTA y del PXOU respective a La Talá de los que s'aplicaron pa otros llugaresde la costa llanisca, citando los casos de Niembru o Toró, y que la figura urbanística que s'escoyó pa esti espaciu tampoco nun ye afechisca.

Al paecer de SEO/Birdlife el Plan Parcial de La Talá contradiz dafechu lo que manda la CUOTA pa actuaciones na costa, al nun aplicar una faza de protección de 500 m. y al permitir una alta presión urbanística, cosa que namás tendría xustificación pol interés personal y pola rellación con una empresa promotora. D'otra banda, SEO argumenta tamién la pertenencia de La Talá a dos figures especiales de protección mediuambiental pa que nun se dea de pasu'l proyectu d'urbanización enxertu nel PXOU. Asina, primero taría la pertenencia de La Talá al Paisaxe Protexíu de la Costa Oriental y, en segundu llugar, a la Zona d'Especial Protección pa les Aves (ZEPAS) "Ribesella-Tinamayor". SEO/BirdLife tamién ve contradicción en que la CUOTA encargue una evaluación d'impactu mediuambiental al mesmu tiempu que se declara'l llugar como urbanizable, yá que l'estudiu d'impactu tien de ser elementu condicionante pal cambéu de categoría del suelu, non facese depués.