La Sociedá Cultural Xixonesa entrega a la XDLA'l XXIV Premiu Juan Ángel Rubio Ballesteros

Reconoz asina el llabor del coleutivu na "defensa y dignificación del asturianu".

El xuráu del XXIV Premiu Juan Ángel Rubio Ballesteros, aconceyáu'l pasáu 4 d'avientu, decidió conceder esti añu'l gallardón de la Sociedá Cultural Xixonesa a la Xunta pola Defensa de la Llingua Asturiana (XDLA). L'actu va tener llugar esta tarde, a les 19.30 hores, nel llocal de la entidá.

Los representantes de la XDLA van recibir una obra del artista xixonés Jesús Castañón. Esti gallardón lleva'l nome de Rubio Ballesteros, históricu presidente de la Sociedá Cultural Xixonesa fináu nel 1993, y distingue a una persona o coleutivu "que, venceyáu con Asturies, defendiera los sentimientos de respetu a los derechos humanos, preservando'l principiu básicu d'igualdá y defendiendo los conceptos éticos y morales que dignifiquen a la persona".