La sociedá civil demanda a Moriyón que nun permita "un retrocesu del usu del asturianu"

Asociaciones xixoneses firmen un manifiestu nel que denuncien "el sectarismu de la nueva conceyala de Festexos" y esixen al Conceyu que se posicione sobre'l vetu al idioma.

La Sociedá Cultural Xixonesa; l'Atenéu Obreru de Xixón; l'Asociación Cultural Caja de Músicos; la Sociedad Cultural Gesto; l'asociación Grana, N'Alcordanza de Yolanda Huergo; y la Compañía Asturiana de Comedias dieron esti pasu "énte les declaraciones de la nueva conceyala de Festexos de Xixón nes que manifestaba que dende Divertia nun se va programar a artistes qu'utilicen la llingua asturiana". "Estes palabres ponen de manifiestu la inaudita intención de la conceyala, y la de la formación que representa, de censurar y desaniciar a la cultura y la llingua asturiana, como parte de la so acción de gobiernu", entama'l documentu, nel que rescamplen que'l "vetu al asturianu ye parte d'un programa ideolóxicu que non se circunscribe a la llingua, como se ta viendo n'otros conceyos y comunidaes nos qu'esta formación política apuerta al poder, sinón qu'afecta a otres llibertaes y derechos fundamentales", entamen.

Entienden que "esta midida supondría un grave agraviu tanto pa la ciudadanía, que se vería privada del accesu a espectáculos n'asturianu, como pal sector de la música y les artes escéniques n’Asturies, que s'espresa en gran midida en llingua asturiana y qu’en Xixón tien, amás, una importante presencia y implantación con iniciatives impulsaes tanto pola iniciativa privada como pola pública, que faen parte de la identidá de Xixón dende tiempu inmemorial y que tienen especial presencia dende la recuperación de la democracia na programación de festexos local", y recuerden que l'intentu de desaniciu del idioma inclumple tola llexislación esistente, incluyendo "les ordenances y planes vixentes del Conceyu de Xixón".

Por too ello, esixen a la "alcaldesa Carmen Moriyón y el so equipu de gobiernu" que "garanticen que les compañíes y músicos qu'utilicen l'asturianu como llingua pa les sos propuestes nun van sufrir el vetu nin la discriminación per parte de Divertia; que nun se recule nel usu del asturianu dende la conceyalía de Festexos; qu'esta conceyalía nun sía un territoriu ensin llei a la que nun s'aplique los planes de normalización llingüística locales, y qu’en Xixón va siguir cumpliéndose la llexislación internacional, europea, española y local que garantiza la promoción del asturianu, ensin que se produza un retrocesu del usu del asturianu en nengún de los ámbitos de competencia municipal, incluyendo la conceyalía de Festexos que nun puede convertise nun cotu priváu de la discriminación y l’odiu".

Por último, demanden que "nun se dexe qu’esti tipu de polítiques y declaraciones sectaries, frutu del estremismu escluyente y qu'amenacien la convivencia, la igualdá y los derechos sociales se normalicen". Les seis asociaciones conviden a otros coleutivos de la sociedá civil xixonesa "que se sumen a esti manifiestu" y afala a tol sector musica a sofitar el manifiestu 'Música n’asturianu, sí' que se ta moviendo estos díes, con gran repercusión y firmes relevantes d'artistes de dientro y de fuera d'Asturies.