La situación del asturianu llega a la ONU

La Xunta Pola Defensa la Llingua Asturiana ta acabante de presentar nes mas altes instancies de la Organización de les Naciones Uníes la situación y la problemática de la llingua asturiana y la represión de los drechos llingüísticos de los sos falantes. Los contactos cola ONU entamaron dende Uviéu, solicitando de forma oficial ser recibíos por la oficina d'Asuntos llingüísticos na sede central de la ONU en Nueva York. Tres de los primeros contautos, pasóse a organizar lo que debía ser la comisión encargada, qu'acabaron formando los profesores Mabel González, del Borouch College University of NY y Xuan Santori, ex-profesor de la Universidá de Wisconsin-La Crosse, conocedores del sistema alministrativu nos EE.UU.Na presentación énte la ONU, los dos representantes de la Xunta apurrieron documentación, entregándo-yos a los funcionarios de la ONU l'Informe sobre la Llingua Asturiana y l'Informe Sobre la Represión y Non Reconocencia de los Drechos Llinguisticos n'Asturies, dambos editaos pola Academia de la Llingua Asturiana. Tamién se dieron copies de la ponencia abierta de la Xunta pola Defensa de la Llingua Asturiana, firmada por casi un cientu de organizaciones y colectivos, el Llibru Blancu de la Recuperación y Normalización Llingüística d'Asturies, la Gramática de la Llingua Asturiana y un volume del Diccionariu Académicu de la Llingua Asturiana.
Tres d'esti primer contactu la representante de la ONU mostróse altamente receptiva y na conversación reconoció la problemática del asturianu como asumible por parte d'esta organización internacional. Dende la sede de la ONU punxéronse tamién en contautu cola UNESCO, l'organismu de la ONU competente n'esta temátca, onde indicaron el procedimientu adecuáu a siguir, consistente na presentación de la situación énte la oficina d'asuntos llingüísticos qu'asume estos casos la UNESCO.
Yá na sede central de la UNESCO en Nueva York los unviaos de la Xunta informaron tamién de les intenciones de dar a conocer la situación de discriminación llingüística n'Asturies y solicitáron-y l'amparu a la UNESCO.Otra vuelta confirmóse la receptividá por parte d'esta entidá internacional, que dio parte del asuntu al órganu pa temes llingüísticos de la UNESCO con sede Central en París.
De forma constante la comisión comunícase cola secretaría de la Xunta n'Uviéu pa dir llevando un seguimientu puntual de les actuaciones, que d'agora en p'alantre van a continuar en París y qu'agora ye la encargada de desenvolver les acciones afayadices.

La Xunta diz que quier sorrayar la mui positiva impresión cola que volvió la comisión d'esta visita, rescamplando la receptividá y consideración cola que los trataron, en contraste col tratu que gasten les alministraciones asturianes. Tamién-yos llamó l'atención la sorpresa de los funcionarios de la ONU énte esta problemática, que tan más avezaos a ver n'otru tipu d'estaos supuestamente menos democráticos.

Contador Estadistiques