La Sidra pide a FAC que la sidra quede escluyida de la ordenanza de convivencia ciudadana de Xixón

La revista La Sidra ta acabante de solicitar al Conceyu de Xixón que permita’l consumu de sidra na cai porque “forma parte de la nuesa realidá sociocultural”. El borrador de la ordenanza de convivencia nun permite beber alcohol na vía pública.

La espublización de l’Asociación Cultural Ensame Sidreru reclama a Foro Asturias Ciudadano (FAC) “que se recueya espresamente como esceición na ordenanza del ‘botellón’, el consumu de sidra en llugares públicos, darréu qu’ésti siempre foi tradicional na nuesa ciudá, lo mesmo que nel conxuntu’l país, y enxamás nun dio llugar a los problemes que se-y acoten al ‘botellón’, nun pudiendo considerase en dengún casu como un problema de salú pública, sinón como espresión de la nuesa ancestral cultura sidrera que non sólo tien de ser abellugada y respetada, sinón incentivada na midida lo posible”. La parte del borrador de la ordenanza de convivencia ciudada de Xixón relativa al consumu d’alcohol, que prohibe beber na cai aquelles bébores que nun se mercaren n’establecimientos hosteleros y que nun tien el sofitu del restu de grupos municipales, foi ellaborada tomando como referencia les normatives d’otres ciudaes del Estáu, polo que “nun recueye la singularidá de la sidra”, según espliquen dende La Sidra, que demanda que la ordenanza nueva s’afaye “a la nuesa realidá sociocultual” y qu’incluya “la esceicionalidá del consumu de sidra en llugares públicos”.

“Pa La Sidra resultaría llamentable que, como consecuencia de les disposiciones pa controlar el vezu foriatu del ‘botellón’ en función de los problemes de sanidá público que se-y atribúin, acabe perxudicándose una de les nueses espresiones culturales más auténtiques, talo como intentaren n’anteriores corporaciones cuando quinxeren torgar echar sidra fuera de los establecimientos hosteleros”, finaliza’l comunicáu de la revista.