Día del Llibru Asturianu

La sidra asturiana foi protagonista na Feria de Frankfurt

|

La feria internacional de sidra Apfelwein im Römer celebróse esta fin de selmana pasada cola sidra asturiana como protagonista. Los medios alemanes sorprendiéronse col escanciáu y destacaron la presencia de la nuesa bébora.
 
El Grupo Trabanco foi’l representante asturianu escoyíu por Eduardo Coto, delegáu n’Europa de revista La Sidra, y los llagareros alemanes y organizadores del eventu, Andreas Schneider y Michael Stöcklpa, pa esti certame internacional que muestra sidres procedentes de países como Alemaña, Canadá, Suiza, Francia, Reinu Xuníu, Finlandia o Xapón. Yera la primer vegada que la sidra asturiana participaba nel eventu y les sensaciones de Samuel M. Trabanco, xerente del llagar de Llavandera, foron perbones. “Con aiciones como ésta, esperamos contribuyir al reconocimientu internacional de la sidra fecha n’Asturies. La nuesa esperiencia na feria de Römer foi mui positiva y anímanos a desarrollar aiciones comerciales nueves nun mercáu como l’alemán, nel que la sidra pue ocupar un llugar mui destacáu”, afirmó.
 
L’alcaldesa de Frankfurt, Petra Roth, y los llagareros d’otros puntos del planeta presentes destacaron les cualidaes de la sidra asturiana. Inclusive, Roth, según el testimoniu de Samuel, interesóse pola importancia del escanciáu y pol certificáu de calidá de la sidra d’escoyeta. La novedá que supunxo la presencia de la nuesa bébora tradicional nel Apfelwein im Römer, feria que contó con una asistencia de más de 1.000 persones ente los que s’atopaben periodistes especializaos, críticos gastronómicos y munchos curiosos, llevó a los medios de comunicación alemanes a centrar l’atención na sidra natural. Asina, la cadena de televisión del estáu federal de Hesse, HR Fernsehen, abrió la información de la feria internacional de Frankfurt falando de la bébora asturiana.

Comentarios

Lo más gracioso ye que esti eventu fuere sin la colaboración ni participación de nengún ente públicu asturianu. Cola iniciativa y el trabayu de un solo asturianu en Alemaña consiguen más que les miles de perres gastaes pelos entes públicos en promoción, o asociaciones de llagareros (con intereses políticos) y demás cazurraes que nun sirven pa nada.
En Asturies lo que fae falta ye iniciatives y compromisu, tien que acabase el repartir perres ente amiguinos sin conseguir oxetivu algún.

Contador Estadistiques