La Semiente entama un amagüestu na plaza d'abastos de L'Entregu

El Centru Social La Semiente va celebrar esti vienres un amagüestu na plaza d’abastos de L’Entregu al que convida a tol pueblu. Yá pela nueche, va treslladar la folixa al so llocal, onde va haber delles actuaciones y escenariu abiertu.
               
El repartu de sidra dulce y castañes va principiar a les 18 hores na plaza d’abastos, llugar onde tamién va instalase un mayu tradicional y un llagar pa que los neños y neñes puedan mayar mazana y conocer un poco más sobre’l procesu d’ellaboración de la bébora tradicional d’Asturies. A les 21.30 hores, la celebración va treslladase al centru social, asitiáu na cai Eladio Jove, onde va haber música, poesía y monólogos. Dende La Semiente conviden a tol mundu a participar nesta folixa y animase a xubir al escenariu abiertu a canciar, recitar, contar una historia o tocar un instrumentu.
 
Con esti amagüestu, La Semiente pieslla la programación del mes d’ochobre que güei, como ye vezu los xueves, tien prevista una actividá. Asina, a les 20 hores, va tener llugar una proyeición dinámica de ‘Las uvas de la ira’ que va servir pa analizar la política migratoria estatal y europea d’esta década última y la so vinculación cola crisis. Adama Diouf, de la Ruta Escontra’l Racismu, y Eduardo Romero, de Cambalache, van ser los encargaos d’averar esti asuntu a los presentes.