La Semiente continúa cola campaña de recoyida de material escolar p’ayudar a les families más necesitaes

El Centru Social Autoxestionáu La Semiente tien en marcha una campaña de recoyida de material escolar p’ayudar a les families más necesitaes na  ‘vuelta a la escuela’. El 10 de setiembre va principiar el repartu de los llibros.
 
Tola xente interesao en collaborar a ayudar a rebaxar los gastos a les families del conceyu de Samartín del Rei Aurelio nesta época complicada pa munchos pas con fíos n'edá escolar pueden llevar llibros de Primaria y Secundaria del cursu 2011-2012, asina como cualisquier tipu de material, a la sede de La Semiente, na cai García Jove númberu 6 de L'Entregu. Nel casu de nun poder desplazase, tamién pue llamar al númberu de teléfonu 696.209.016 pa que miembros de La Semiente pasen a recoyer el material donáu al so domiciliu.
 
Tolos llibros, cuadernos, llápices o bolígrafos acumulaos na sede del CSA entreguín van tar a disposición de les families que lo necesiten a partir del 10 de setiembre los miercóles y xueves n’horariu de 17 a 19 hores. Otra manera, dende La Semiente anuncien la so intención d’ampliar esti tipu d’actividaes solidaries ente los vecinos del conceyu cola creación d’una Caxa de Solidaridá Vecinal pa recaudar perres pa les families que tán sufriendo más l’efeutu de la crisis.