La Selmana Mundial de les Persones Refuxaes propón delles actividaes n'Uviéu que lleven a la reflexón

El 20 de xunu ye’l Día Mundial del Refuxáu. Por esti motivu, entama n’Uviéu la Selmana Mundial de les Persones Refuxaes, que va constar de delles actividaes pa reflexonar sobre esti problema qu’afeuta a millones de persones.

L’Axencia Asturiana de Cooperacion, la Federacion Asturiana de Conceyos y la Coordinadora de’ONGD del Principáu d’Asturias (CODOPA) son les entidaes encargaes de llevar alantre esta iniciativa que principia güei, a les 18 hores, con una charra a cargu de persones acoyíes dende’l 1 de mayu pol Programa Asturianu d’Atención a Víctimes de la Violencia en Colombia. Ésta va tener llugar nel Centru Social de Vallobín y nella van participar Walter Agredo Muñoz, defensor de Derechos Humanos y responsable de la Fundación Comité de Solidaridad con los Presos Políticos en el Valle del Cauca, y Marcos Reinerio Montealegre, dirixente llabrador productor de café amenazáu y desplazáu forzáu de la so tierra. Una hora depués, nel salón de la Biblioteca Pública Pérez de Ayala, va proyeutase, en collaboración con Mensajeros de la Paz, del documental ‘Quiero irme a casa: jóvenes refugiados en Jordania’.

Amás, tamién dende güei, y hasta’l 20 de xunu, se pueden visitar trés esposiciones. La primera, de nome ‘Jóvenes refugiados: salir del exilio’ ye obra d’ACNUR y tien sede nel Palaciu de Conde Toreno. Tamién ACNUR entama otra muestra, nesti casu na sede de la Procuradoría Xeneral d’Asturies, baxo’l títulu ‘Escuchamos las voces de los/las refugiados/as y desplazados/as’. Por último, Mensajeros de la Paz presenta na Xunta Xeneral ‘Quiero irme a casa: jóvenes refugiados en Jordania’, que lleva’l títulu del documental dirixíu por Cristina Antuña y Patricia Simón.

Actos centrales

Los actos centrales de la Selmana Mundial de les Persones Refuxaes van tener llugar los díes 17 y 19. La sede de la Procuradoría Xeneral d’Asturies va acoyer el llunes la mesa redonda ‘Protegiendo a las personas refugiadas: marco legal y acción en el terreno’, que va presentar Esther Díaz García, conseyera de Bienestar Social y Vivienda, y na que van intervenir Padre Fr. Khalil Jaar, presidente de Mensajeros de la Paz Oriente Mediu y, l’eurodiputáu Antonio Masip. Tamién van participar nel actu la procuradora xeneral María Antonia Fernández Felgueroso, el Padre Ángel, presidente de Mensajeros de la Paz, y José Avelino Sánchez Menéndez, presidente de la Federación Asturiana de Conceyos.

Mentes, el miércoles de nueche, na víspora del Día Mundial del Refuxáu, la Xunta Xeneral va iluminase d’azul ente les 22 y les 2 hores, al igual qu’otros munchos edificios del planeta, en solidaridá coles persones desplazaes de la so tierra. L’entamu d’ésta actividá, asina como del restu que se desendolquen a lo llargo de la selmana, tien como oxetivu “reflexonar sobre les causes y efeutos del refuxu y incitar a participar na defensa de los derechos de los homes, muyeres y neños que se vieron obligados a fuxir del so llar porque temíen pola so vida, la so seguridá o la so lllibertá”, espliquen dende la organización.

Completen les actividaes d’esta Selmana les proyeiciones ‘Casas de piedra’ (mañana), el certame de curtiumetraxes ‘Refugiados’ (martes), ‘Colombia, nuesta última oportunidad’ y ‘La tierra prometida’ (miércoles), y ‘La tierra habla árabe’ (xueves). Toes van tener llugar a les 19 hores nel salón de la Biblioteca Pública Pérez de Ayala. Amás, tamién va tener llugar una charra nel Centru Social ‘El Cortijo’ el xueves próximu, a les 18 hores, na que van intervenir dos persones del Programa Asturianu d’Atención a Víctimes de la Violencia en Colombia: Andrés Bohoquez De La Rosa, dirixente sindical amenazáu de muerte, sobreviviente d’un atentáu y desplazáu forzáu, y Elsida Rojas Menco, defensora de Derechos Humanos víctima de desplazamientu forzáu en Colombia, amenazada de muerte por defender los derechos de les muyeres refuxaes y víctimes de violencia sexual nel contestu del conflictu armáu.