La selmana en bolsa

La inestabilidá xeopolítico internacional y les duldes no macroeconómico nun son torga pa que'l selectivu Ibex-35 s'asitie yá penriba los 8.300 puntos. Namás la xuba del petroleu frenó al índiz selectivu que yá amenaza la raya sicolóxica de los 8.400. Los inversores faen un apueste claru pola renta variable d'equí a fin d'añu, como bien diz la medra nel volume de negociu de la Bolsa de Madrid. Nos mercaos internacionales los resultaos foron mui probetayos, sobremanera en Nueva York.

Les estadístiques más importantes de la selmana diéronse na Zona Euru, casu del PIB del Reinu Xuníu qu'algamó un +0,4% nel tercer trimestre, una décima perbaxo de lo estimao. L'IPC francés del mes de setiembre foi del 0,1%, meyor que lo esperao, mentanto que les ventes al por menor d'Agostu n'Italia cayeron el 0,1%.

L'iviernu ta metiéndo-yos mieu a los brokers de mercaos de futuros. L'ablucante xuba del consumu enerxéticu, les probetayes reserves y la importante actividá especuladora ta poniendo bien arriba'l preciu del barril de petroleu. De fechu, el barril Brent cotizó a 51,5 dólares mentanto que'l West Texas asitióse nos 55,35 dólares. Los analistes nun escaecen les repercusiones catastrófiques que puen tener estes xubes, más si tovía ven posible'l barril a 60 dólares. De momentu les repercusiones inmediates nun son comparables cola crisis enerxética del 73 porque anguaño hai dellos órganos como'l FMI y Bancu Mundial mui activos y vixilantes, porque les economíes deprendieron la llección d'otres crisis y saben cuáles son les meyores intervenciones, porqye hai un mayor compromisu de la OPEP de caltener precios relativamente estables y porque yá tan furrulando nueves enerxíes y polítiques d'eficiencia enerxética que, sin ser tovía alternatives, si frenen la influciencia del oru prieto. De toles maneres la mayoría de los productos tienen componentes y materiales orixinaos del petroleu y el 70% del consumu va pal tresporte. Na Zona Euru les repercusiones nes economíes son menores gracies a la fuercia del euru sobre'l dólar, ya que'l barril de petroleu mércase en dólares.

Importantes perdes nes bolses de Nueva York pola xuba del petroleu, con mínimu añal nel casu del Dow Jones, asitiándose nos 9.757,81 (-1,09%). L'índiz tecnolóxicu Nasdaq cayó'l 1,97% hasta los 1.915,14 puntos. Nel Vieyu Continente les coses nun pintaron meyor. Les perdes llegaron a Francfort, Londres y París con resultaos mui probetayos.

L'Ibex-35 de Madrid finó la selmana nos 8.372,40 puntos (+0,32%). El volume de negociu nel parqué madrilanu algamó los 1.953 millones d'euros, con valores beneficiaos como Arcelor, Iberia, Telefónica y Endesa . Nel terrén de les perdes apaecen Iberdrola, Prisa, Ferrovial, Jazztel, Gamesa y FCC. Un datu importante foi que'l BBVA ya val más en bolsa que'l SCH dempués de les últimes cayíes bursátiles del bancu de Botín dende l'anuncia de la operación de compra del Abbey National británicu. El mieu pola xuba del petroleu conocióse pola alvertencia del Ministru d'Economía Pedro Solbes, que nun ve que la economía medre según la previsión oficial del Gobiernu. Tamién l'asturianu y presidente del FMI, Rodrigo Rato, da anuncia de que'l petroleu pue dar munchos problemes si nun se frenen los precios.

Xuba llibre de la divisa europea que paña les desgracies macroeconómiques del dólar. Asina, l'euru ya val 1,2613 dólares unidá, una cotización que tovía tien camín pa llegar a los 1,29 dólares unidá. El casu ye que la comunidá inversora ve cada vegada a la divisa europea más sólida y l'euru ta convertiéndose nun valor refuxu pa dellos inversores. Tranquilidá nel mercáu de renta fixo colos bonos alrodiu'l 3,8% de rentabilidá. Los economistes nun ven munchos cambeos na política de tipos d'interés hasta l'añu que vien. Otramiente, l'oru caltuvo una cotización penriba los 400 dólares onza.