La selmana económica

La productividá norteamérica ta enfriando mentanto que'l mercáu llaboral de la primer economía del mundiu tampoco nun espoxiga. Los febles resultaos macroeconómicos de la selmana frenaron la tendencia alcista que llevaben les bolses internacionales. Asina los probetayos datos d'Estaos Xuníos tiraron p'abaxo pelos índices de Wall Street énte una desconfianza de la comunidá inversora. Esti fechu sirvió d'emburrie pa la moneda europea.

La productividá de les empreses d'Estaos Xuníos medró a un ritmu más baxu del esperáu y el Departamentu de Trabayu norteamericanu dio anuncia d'unos probetayos resultaos faciendo unes perspectives a curtiu plazu bastante pesimistes. El sector de la construcción ye ún de los más afectaos por esti frenazu económicu. Nel mes de xineru creáronse nos Estaos Xuníos 112.000 puestos de trabayu, algamando una tasa de desemplegu del 5,6%. Estes cifres tan lloñe de los 175.000 emplegos qu'estimaben los economistes. Con ello, la Reserva Federal nun va poder xubir los tipos d'interés, lo que va enanchar la distancia ente les divises dólar y euru cola inestabilidá qu'ello conlleva. Asina los mercaos de divises y de renta fixo foron los más afectaos.

Wall Street foi la plaza más afectada, compensada namás pol enfotu de los inversores nel sector tecnolóxicu. Finalmente l'índiz Dow Jones algamó los 10.593,03 puntos mentanto que'l tecnolóxicu Nasdaq mangóse nos 2.064,01 puntos. Les bolses del Vieyu Continente pesllaron la selmana en positivo. La Bolsa de Francfort foi la que más xubió'l vienres pasáu con un pieslle positivo del 0,75%. Llondres y París tuvieron xubes de cerca del 0,3%.

L'Ibex-35 tornó a los 8.000 puntos, cota sicolóxica perimportante, con una xuba nel conxuntu de la selmana pasada del 1,2% destacando'l volume de negociu, el mayor na so hestoria, con 4.415 millones d'euros moviéndose pel parqué. Ente les xubes destaquen Iberia y Prisa que medraron penriba'l 3,5%. La estrella de la selmana foi Sogecable con una xuba del 5%. Los blue chips como BBVA y Santander penriba'l 1,5% más. A los analistes presto-yos a esgaya l'anuncia del BBVA de facese col control total de la filial mexicana Bancomer al traviés d'una OPA. El sector bancariu en xeneral tuvo una selmana positiva con bonos resultaos tamién de Banesto, Popular y Bankinter. El Grupu Telefónica tuvo una bona selmana con xubes destacaes na matriz, na filial de móviles y en TPI. Nel terrén de les perdes tan Altadis y Arcelor. Los valores de los sectores de bienes de consumu y de la construcción foron los más castigaos polos inversores.

Les negatives anuncies del otru llau del Atlánticu llevaron al euru a una xuba del 2% hasta les 1,27 unidaes. A los economistes del BCE nun-yos presta un res la traza que lleva la divisa europea, que yá preocupa nel G-7

Nel mercáu de renta fixo la selmana pasada foi negativa pa la rentabilidá de los bonos a diez años, especialmente pal bonu alemán que terminó con una rentabilidá del 4,139%. El petroleu tuvo una selmana de blincos na qu'influyeron la situación d'Iraq, la decisión de la OPEP de trancar el cañu y l'apagón nuna refinería d'Estaos Xuníos. Con too ello, el preciu llegó a mangase penriba los 30 dólares barril. L'oru tuvo una selmana munchu meyor algamando la xuba más importante nel mes. El metal mariello terminó cotizando nos 404 dólares la onza