La selmana de les lletres terminó n’A Veiga

L'últimu actu oficial de la Selmana de les Lletres Asturianes oranizada pola Conseyería de Cultura desarrollóse ayeri nel polideportivu d'A Veiga, onde s'axuntaron escolinos de tolos conceyos del Navia-Eo pa celebrar la "Semana das lletras en Gallego-Asturiano" un actu al qu'asistió'l Director de la Oficina de Política Llingüística Ramón d'Andrés. El responsable de la oficina afirmó énte un bon garapiellu d'alcaldes de la zona que'l so departamentu y, por estensión el Gobiernu asturianu, nun diben tolerar "intromisiones" en referencia a los proyectos redactaos en Galicia pa esparder al Navia-Eo polítiques de normalización del gallego na zona.

Contra les inxerencies esteriores, Ramón d'Andrés defendió la efectividá de les polítiques que s'entamen dende'l so departamentu pa normalizar el gallego asturiano nel Navia-Eo, citando'l fechu de que fuere ún de los conceyos eonaviego, El Franco, el primeru n'oficializar la so toponimia tradicional, el fechu de que se fexere una campaña específica pa la matriculación en gallego-asturiano na escuela y el que yá se tea trabayando en llibros de testu y materiales específicos pa la escolarización na fala eonaviega.