La Selmana de Josefa Canellada

Esti añu la Conseyería de cultura va centrar los actos de la Selmana de les Lletres asturianes na figura de Mº Josefa Canellada, filóloga, escritora y recopiladora de la tradición oral asturiana que morrió hai unos pocos años. Esta mesma selmana, el Conceyu de Cabranes (d'onde yera natural) fexo dellos actos na so memoria, a la que se-y dedicó tamién el nome d'una plaza en L'Infiestu, que foi la villa onde nació.
Mº Josefa fexo una obra rigurosa y pionera en munchos sentíos, col so estudiu de la fala de Cabranes, que se publicó nos años 40 del sieglu pasáu y ensin abandonar los estudios filolóxicos rellacionaos col nuestru idioma, publicó dos novelines nos años del Resurdimientu lliterariu asturianu: Montesín, que ye básicamente un cuentu pa ñeños y Malia, Mariantia y yo, que-y dieron un prestixu ente los escritores asturianos que nun algamó con nenguna de les otres obres lliteraries en castellanu, especialmente pol usu d'un léxicu mui ricu y la fidelidá a la llingua falada. Amás foi mui bien conocida pola so recopilación de los años 70 "Leyendas, cuentos y tradiciones" onde apañaba tradición oral básicamente de la parte de Cabranes, Piloña, Colunga y por "Cuentos Tradicionales Asturianos" onde a la recopilación propia axunta obres espardíes en monografíes y autores estremaos.Canellada nunca perdio'l contactu con Asturies a pesar de vivir en Madrid dende mui moza, al mesmu tiempu que se xuntó a la causa de la normalización del asturianu ensin contradicción nenguna con tar casada con un destacáu miembru de la RAE.
Mº Josefa foi miembru de l'Academia de la Llingua Asturiana, cola que collaboró con artículos, estudios y comunicaciones.