La selección catalana de Hockey podría enfrentase a la d’España

Con un marcador de 6-0 contra Inglaterra na final del mundial "B" de Hockey sobre patinos, que se celebró en Macau, Cataluña, que salía de favorita, convertíase ayeri na primer autonomía española en participar y ganar nun mundial absolutu de deportes. El trunfu pon a la selección catalana, polo menos en teoría, nel mundial "A" nel que tamién compite la Selección Española.

Ello podría armar un espolín enorme n'España, en cuantes qu'amás el precedente del Hockey podría abrir una espicha pela que podríen salir tamién selecciones independientes catalanes d'otros deportes mayoritarios, casu del baloncestu o del fútbol. La Federación Internacional tien la pelota (o la pastiella) en teyáu, y tien que decidir pal mes qu'entra si Cataluña xube al Mundial "A" xunta Inglaterra y Andorra (segunda y tercera clasificaes en Macau) o si-y retira'l derechu al ascensu pa nun entrar nun conflictu políticu.


Pasqual Maragall, presidente catalán, fizo un viaxe d'urxencia a Macau pa poder ver la final, acompañáu por Carod Rovira en representación d'ERC, socios de gobiernu del PSC, y un bon garapiellu d'altos cargos catalanes venceyaos al deporte. El viaxe de la delegación catalana nun sentó precisamente bien nel PP, que yá pidió una comparecencia del Secretariu d'estáu pal Deporte Jaime Lissavetzki, pa que dea esplicaciones. Si la presencia de Maragall na tribuna yá se tomó como una provocación, les declaraciones de Maragall a la prensa dempués del trunfu debieron restallar nos oyíos de munchos. Coles últimes notes de la versión coral de "Els Segadors" cola que se celebró'l trunfu, retumbando nel pabellón de deportes, el presidente catalán díxo-yos a los periodistes que Cataluña tenía "derechu a participar nel Mundial "A" y prometió que "Vamos ganar a España".


La prensa catalana y madrileña divídense dafechu pa valorar el trunfu catalán nel mundial de hockey, y asina mientres el diariu deportivu catalán Sport titula "A un paso de ganar la guerra" en referencia a la batalla pol reconocimientu de les selecciones catalanes, l'ABC espubliza una columna baxo'l titular "Esperpento en Macao". Más información nel diariu electrónicu catalán Vilaweb