La segunda edición de los cursos d’asturianu y gallego-asturiano p’adultos Falamos abre la inscripción

El 20 d’abril va arrancar n’Uviéu y A Veiga la segunda edición de los cursos de baldre de formación non reglada d’asturianu y gallego-asturiano p’adultos Falamos. Depués de la esperencia pilotu del añu pasáu, auméntase’l presupuestu del programa semipresencial que tamién tien abierta la inscripción en Piloña, Gozón, Candamu y Tinéu.

Más de 300 persones tomaron parte na primer edición de Falamos, que llegó a 16 conceyos de tol país. En dos, Mieres y Uviéu, tuvo que doblase la ufierta pola demanda alta.

Agora’l programa impulsáu pola Conseyería de Cultura, Política Llingüística y Turismu y la Federación Asturiana de Conceyos (FACC) pretende convocar unos 30 per toa Asturies col oxetivu d’ufrir nociones d’asturianu o gallego-asturiano a los ciudadanos que nun dominen l’idioma, pa lo qu’aumentaron el presupuestu un 52 por cientu hasta los 131.500 euros. D’esta forma, depués de les 22 hores en llinia y 20 presenciales dividíes n’ocho sesiones, los alumnos van poder desenvolvese en situaciones cotidianes.

El temariu de Falamos ellaboróse con una estructura cenciella y dinámica, incluyendo aspeutos venceyaos al vocabulariu y la gramática del idioma pa poder manexalos: términos y estructures rellacionaes col ámbitu personal y corporal, emocional y familiar; casa, pueblu y ciudá; comerciu y alimentación; trabayu y tiempu llibre, amás de recursos llingüísticos sobre entornos naturales, viaxes, multiculturalidá, Internet y medios de comunicación.

La fecha d’entamu de los cursos semipresenciales convocaos hasta agora ye’l 20 d’abril pal d’Uviéu y A Veiga; el 24 pa Piloña y Gozón; el 4 de mayu en Candamu; y el 8 en Tineú. La inscripción pa toos ellos yá ta abierta.

Na semeya, un momentu d'una clase de la edición pasada n'A Caridá.