La saga de los Álvarez, emigrantes asturianos y personaxes históricos

El Pabellón de Caxastur na edición d'Anguaño de la Feria de Muestres de Xixón sorprende al visitante con una esposición sobre la saga de los Álvarez, una familia d'aniciu asturianu, que dende va cerca de ciento cincuenta años, lleva aportando abondos descubrimientos al mundu de la ciencia.

Un premiu nóbel de física, el descubrimientu de la teoría del desaniciu de los dinosaurios y los avances de la medicina y la salú público son parte del recorríu per esta historia familiar qu'entama en 1853 col nacimientu, cerca d'Uviéu, de Luis F. Álvarez, el primeru de la saga. Con namás 13 años, Luis, güerfanu de padre y madre, tuvo que colar pa l'Habana, onde, amás de deprender l'inglés, metióse al negociu del tabacu, nel que l'hermanu yera un personaxe importante, anque la so carrera acabó por ser la de médicu. Luis anduvo per delles ciudaes de los Estaos Uníos hasta asitiase en San Francisco y dempués en Hawaii, onde va trabayar en tratamientos mui avanzaos p'aquel tiempu rellacionaos cola llepra. Masón convencíu, Luis yera una personalidá filantrópica que nun tenía reparu en poner perres d'el con tal de que los proyectos en que taba metíu salieren alantre, y taba disponible les 24 hores del día p'atender a los enfermos

El so fíu, Walter C.Álvarez, nació en 1884, y yá dende'l entamu estudió medicina, siguiendo los pasos del padre, pero, al revés qu'elli, Luis fízose un personaxe popular, saliendo muncho na radio y na primer televisión hasta convertise nel "médicu de cabecera d'América" pero amás de persona mediática, Walter foi ún de los primeros investigadores na radioloxía nos anicios del sieglu XX.

Más popular entovía acabó por facese'l terceru de la saga, Luis W.Álvarez, que nació en 1911. En cuenta de médicu, Luis W. Álvarez quixo más metese pola física, trabayando coles mayores autoridaes mundiales dende los años 30 y dempués de la Segunda Guerra Mundial, un periodu en que l'átomu yera'l protagonista de les investigaciones. El mesmu Luis W. Álvarez rescampló nesti estudiu, consiguiendo en 1968 el nóbel de física polos sos trabayos nel estudiu de les partícules. Luis

foi tamién ún de los científicos que desarrollaron la primer bomba atómica, contribuyendo al diseñu del detionador, y foi un de los desarrolladores de la mesma que volaron nel bombarderu "Enola Gay" el día que la tiraron. Pa la paz, los sos descubrimientos en radioloxía y microondes tan nel aniciu de los sistemes d'aterizaxe ensin visibilidá qu'empleguen hoi tolos aviones.

La saga remata, pel momentu, con Walter Álvarez. Nacíu en 1940, Walter ye anguaño profesor de Xeoloxía na Universidá de Berkeley - California, onde ye mayestru en cuestiones de magnetismu terrestre y deriva de los continentes, pero si ye conocíu nel mundu entero ye por ser ún de los descubridores, xunta'l so padre Luis W. Álvarez, de la teoría que diz que los disonaurios desapaecieron pol impactu d'un meteoritu na tierra va 65 millones d'años, una teoría que ganó pesu cuando nel 1991 s'alcontró en México'l posible crater del cuerpu celeste.