La saga de la Guerra de les Galaxes echa’l piesllu

Estrénase güei en tol mundu'l tercer y últimu episodiu de "Star Wars". Amás d'ufrir los horarios na nuestra cartelera, n'Asturies.com convidamos a los nuestros llectores a restolar pelos universos paralelos al mundu de George Lucas que podemos alcontrar pela rede.

Star Wars episodiu III - La venganza de los Sith, llega güei a los cines de tol mundu. Col tradicional fondu de la fanfarria de John Williams y l'entamu colos rétulos introductorios esmuciéndose pal fondu de la pantalla, el tercer episodiu de la serie qu'entamare George Lucas nel añu 1977 promete ser el más siniestru de los seyes de la saga. Los primeros críticos que la vieron nun pase especial emponderaron la película hasta ponela al altor de "L'imperiu Contraataca" segunda película de la serie en rodase y en realidá quintu episodiu nel orde narrativu de la saga.

Naquella película, dirixida por Lawrence Kasdan baxo l'encargu del padre de la criatura, George Lucas, ganaben los malos, y otru tanto asocede nesti tercer episodiu, que va afitar argumentalmente'l puntu de partida pa la triloxía orixinal que plasmó a espectadores de tol mundu ente 1977 y 1983. A saber, el mozu Anakin Skywalker, llamáu a ser l'heriede de la tradición de los Caballeros Jedi, guardianes de la paz y del orde na república, déxase afalagar pola atracción del llau escuru de la fuerza, convertiéndose nel malváu Darth Vader, protagonista de la triloxía orixinal.

A estes altures, repetir l'argumentu de la saga más famosa de la historia del cine quiciás nun aporta muncho, en cuantes que La Guerra de les Galaxes trespasa l'ámbitu de les sales de cine pa convertise nun fenómenu de cultura popular. Amás de l volume de xuguetes, carteles, miniatures y souvenirs de toa triba rellacionaos cola película y los sos protagonistes, munchos directores y videoartistes tienen creaes les sos propies películes ambientándoles nel universu visual de la saga de George Lucas, qu'amás dio permisu pa que s'usaren los sos personaxes y diseños siempre que nun se ficiere con interés económicu.

Asina, pela rede podemos descargar curtios y animaciones que nos treslladen a mundos paralelos al de les películes orixinales. Creaciones tan simplayes pero prestoses como "Star Wars en lletres de codigu ASCII" o les animaciones de la casa LEGO colos sos moñecos basaos na saga abrieron un camín nel que la gran frontera yera la de representar los duelos con espada laser. "Star Wars Kid" o meyor dicho, los amigos que-y pintaron la espada enriba, foron los primeros en llogralo, pero los sos vídeos quedaron en poca cosa cuando Shane Felux, un aficionáu independiente, sacó alantre cola ayuda desinteresada d'un bon grupu d'amigos "Star Wars Revelations" un mediumetraxe ambientáu dafechu nos personaxes y universos de la saga con abondancia d'efectos especiales dixitales de gran calidá.

Más allá de la copia mimética del universu starwarsianu que propón Shane Felux, Jane Cioletti y Lou Tambone crearon en "Silent but Deadly" un homenaxe simpáticu a tola saga. Estos dos creadores , dexando de llau la parte más tecnolóxica de Star Wars, derrompieron moldes con unos curtios que copien la estética del cine mudu y nos que soldaos imperiales baxo órdenes directes del mesmu George Lucas dedíquense a perseguir a los fans de la saga.

Ún de los curtios d'esta saga llegó a estrenase la selmana pasada nel Festival de Cannes paralelamente a la estrena mundial de la película de Lucas nun concursu denomináu "Star Wars Fan Film Awards" nel que tamién se presentaron otres nueve cintes basaes nel universu de la saga. Esti concursu celebróse por primer vegada nel 2002, y nelli destacó na edición del 2004 la cinta "George Lucas in Love" qu'espeyaba'l procesu de creación de la saga.
Pa más información ver tamién la web oficial Star Wars.com, The Force.net y Star Warz