La ruta guiada “Xixón mete mieu” torna a les cais esti mes d’agostu

La tercer edición del ciclu XixónTours de visites temátiques n’asturianu torna a la ciudá.

Tres l’ésitu de les ediciones anteriores, la plataforma de turismu, ociu y hestoria VerAsturies.com y Cuatro Gotes Producciones, cola collaboración de Xixonaldia.com, retomen les visites guiaes del ciclu XixónTours, visites guiaes temátiques n’asturianu que van ufrise al públicu a lo llargo de los meses vinientes.

XixónTours ye una iniciativa pa dar a conocer la ciudá de Xixón a los propios habitantes del conceyu y a los asturianos y asturianes en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n'asturianu.

Les rutes de XixónTours tán diseñaes pa buscar un averamientu orixinal a la hestoria de la ciudá, tratando de da-y un enfoque diferente que llame l’atención del públicu xeneral y n’especial de los y les xixoneses, que yá conociendo los llugares que van visitar, pa que puedan ver aspectos estremaos o desconocíos pa ellos.

Esta tercer edición del ciclu va arrancar pasu ente pasu, y con toles condiciones de seguranza afitaes poles autoridaes. Les primeres visites van ser les de la ruta Xixón mete mieu, diseñada pola hestoriadora y presentadora de TPA, Arantza Margolles, anque dirán añadiéndose otres nes selmanes vinientes.

Xixón mete mieu avera los y les visitantes a los llugares hestóricos de la ciudá onde se produxeron asesinatos, matances, invasiones sangrines, apaiciones de pantasmes y lleendes que mos van llevar n'horariu nocherniegu a conocer los sitios más escuros, terroríficos y misteriosos de la hestoria de la ciudá de Xixón. 

Feches y horarios de les visites guiaes “Xixón mete mieu” pal mes d’agostu

• Xueves 13 d’agostu — 21:30 a 23 hores.
• Miércoles 19 y 26 d'agostu —  21:30 a 23 hores.
• Domingu 16, 23 y 30 d'agostu —  21:30 a 23 hores.

Les visites tienen un preciu de 10 euros pal públicu xeneral y 6 euros pa menores de 18 años. Los menores de 12 años nun han pagar entrada. Ye obligatorio inscribise na páxina web xixontours.verasturies.com. El pagu faise al entamu de la visita n’efectivu. Pa más información o duldes pueden ponese en contacto nel corréu xixontours@verasturies.com

El proyectu xestiónalu VerAsturies.com, al traviés de Cuatro Gotes Producciones y cunta col sofitu de la Oficina de Normalización Llingüística de Xixón y la collaboración de Xixonaldia.com.