La RTPA entamó les sos emisiones ensin presencia del asturianu

La TV autonómica asturiana emprimó les sos emisiones esti vienres con un informativu que salió al aire a les 8 y media de la tarde. Darréu de la información xeneralista d'actualidá y deportes vieno un espaciu infantil de cuentos, pesllando la parrilla de programación una película. Esi va ser l'esquema de programación que va repetise a lo llargo de los próximos díes, un esquema nel que, pel momentu nun hai conteníos n'asturianu.

Cristóbal Ruitiña y Diana Sánchez presentaron los primeros informativos de la RTPA y van facelo tolos díes de selmana mientres que Carolina Gancedo y Raquel Vega van encargase d'ellos los fines de selmana. Pela so parte, Loreto Matilla foi la encargada de presentar los primeros informativos de deportes na estrena de la canal autonómica. Trátase d'unos informativos que nacen con de perfil xeneralista pa tratar noticies d'Asturies y del mundu nun formatu que los responsables de la canal quieren que valga pa que "los asturianos tean informaos dafechu y nun precisen de ver más telediarios n'otres canales" acordies coles palabres del xefe d'antena y conteníos Juan José Guerenabarrena.

Tres de la emisión del informativu y de los deportes, la canal entamó la emisión del cuentacuentos, un programa ellaboráu pola casa "Médula producciones" y que, anque se contaba que diba emitir conteníos n'asturianu, pel momentu namás lo fai en castellanu.

La entrada en serviciu de la RTPA, que va dir enanchando la so ufierta de programación a lo llargo de les selmanes qu'entren, contando pa ello cola collaboración de delles empreses coles que tien subcontratada la producción d'espacios y d'informativos. Acordies cola web oficial de la RTPA, la filial Telefónica Servicios Audiovisuales (TSA) encárgase de la corresponsalía de Madrid, mientres que los espacios deportivos cuerren al cargu de la productora Asturmedia, participada pol diariu La Nueva España. Pela so parte, la productora Zebra -Proima, que trabaya coles empreses Nobel, Ondas Video, Blaster, Videoforma y Flying Apple ellabora dello del conteníu de los informativos, faciendo'l programa infantil la casa "Médula Producciones". Zeta Gestión de Medios, matriz del diariu "La Voz de Asturias" xestiona la publicidá y la empresa Bitácora encárgase de la ellaboración de les promociones. Queda fuera d'esta rellación asoleyada na web de la RTPA'l diariu El Comercio, que nel so día se presentare como ún de los principales collaboradores de la RTPA y que diba encargase d'ocho de les nueve corresponsalíes de la RTPA, en concreto les de Xixón, Avilés, Mieres, Llangréu, Cangas del Narcea, Navia, Nava y Cangues d'Onís.