La RTPA enancha la so rede y llega yá al 88% de los asturianos

L'Ente públicu de Comunicación del Principáu d'Asturies dio anuncia güei de la entrada en funcionamientu de siete repetidores nuevos que van permitir que'l 88,8% de la población asturiana acceda a la señal de la Radiotelevisión Pública d'Asturies (RTPA).

Los repetidores nuevos, que s'amiesten a los 14 que yá funcionaben, asítiense nel monte Naranco d'Uviéu (canal 47), Xixón (canal 41), Villaviciosa (canal 49), Navelgas-Tinéu (canal 62), Curniana (canal 34), La Puela d'Allande II (canal 61) y Trubia (canal 50). Según la RTPA, colos repetidores nuevos, el 96,25 por cientu de los televisores uvieinos yá puen sintonizar la RTPA, mientres qu'en Xixón la cobertura ye del 99,78%. En conceyos como Villaviciosa, onde namás recibíen la señal el 33% de los aparatos, la cobertura pasa a ser de más del 80%, mientres que los repetidores del occidente, pela so parte, pasen a furnir señal a más de les trés cuartes partes de los televisores de la so zona d'influyencia.