La RTPA distribúi un llibru d’estilu de rotulación que trata al asturianu como una llingua foriata

Los trabayadores de la RTPA recibieron el 18 de febreru un documentu que prohibe l’usu de pallabres asturianes y prioriza los topónimos castellanos, según desveló Iniciativa. Neses feches, Antonio Virgili dirixóse con bones pallabres a la XDLA.

En concreto, el direutor xeneral del ente públicu comprometióse énte la Xunta pola Defensa de la Llingua Asturiana (XDLA), nuna carta que recibió’l coleutivu’l 19 de febreru, a respetar la toponimia oficial na televisión y radio públiques. Nella, Antonio Virgili tamién comunicó qu’unviara un escritu a tolos responsables de los programes de la radio y la televisión pa que revisaran l’usu de la toponimia que facíen. Un día enantes, llegaba a manes de los trabayadores de la RTPA dende direición un ‘Manual de rotulación’, una especie de llibru d’estilu, que trata al idioma del país como una llingua foriata. Asina, obliga a poner ente comines la pallabra ‘campanu’, al igual que cualquier anglicismu –nel documentu ponen l’exemplu de la pallabra shock– o galicismu, y a utilizar l’asturianismu en llingua castellana ‘argayo’ en cuenta del términu asturianu ‘argayu’. D’igual forma, da prioridá a la versión castellana nos topónimos billingües y establez l’usu castellanu en tolos nomes de conceyos pese a que la Llei d’Usu y Promoción especifica que los oficiales son los tradicionales.

Dalgunos trabayadores esmolecíos por esta situación dieron la voz d’alarma a Iniciativa pol Asturianu pa que’l coleutivu fixera pública esta falta de respetu nueva pa col idioma, según esplicó a Asturies.com Denis Soria, miembru de la Xunta Direutiva de l’asociación. “Esti fechu ye especialmente indignante, yá que se produz pocos díes dempués de que'l direutor de la TPA escribiere una carta a la Xunta pola Defensa de la Llingua Asturiana comprometiéndose a respetar la toponimia oficial y a promocionala, mientres al mesmu tiempu unvía a los sos trabayadores un documentu nel que pon toles torgues posibles pal so usu”, llamentó nun comunicáu Iniciativa pol Asturianu, que recuerda que l’ente públicu de comunicación ta saltándose la llexislación vixente.

D’igual forma, critica que nun se permita l’usu del asturianu nos informativos, como fai de xemes en cuando RTVE Asturies en ‘Panorama Regional’, pese qu’hai periodistes que dominen l’idioma na plantiya, y afirma que "una televisión pública asturiana nun tien sentíu si nun ye pa da-y usu a la llingua asturiana nes sos emisiones".