La RPA nun ta emitiendo'l boletín informativu n'asturianu de les 12

La XDLA alerta de qu'asocede dende'l 27 d'ochobre y pide la dimisión de Francisco González Orejas "énte los pasos atrás de continuu nel usu del idioma en RTPA".

'Les noticies n'asturianu' ye l'únicu espaciu d'información que produz RPA, diez minutos que cuenta l'actualidá diaria en llingua asturiana. Emítese de llunes a vienres a les 12 hores pol llabor voluntariu del periodista Naciu Varillas, pero l'ente públicu de comunicación nun lu sustitúi nel momentu en qu'esti profesional garra descansos, como ye'l casu.

Asina, dende'l 27 d'ochobre los oyentes de la radio asturiana quedaron ensin l'únicu momentu del día nel que pueden informase en llingua asturiana. Una situación que se suma "a los pasos atrás que dio l'asturianu na RTPA nesta llexislatura, na que nun se dobló nenguna película o serie de dibuxos animaos y tampoco nun se retresmitió nengún partíu de fútbol n'asturianu, iniciatives éstes que, con too, siempre se programaron de forma simbólica y anecdótica, ensin nenguna continuidá", apunta la Xunta pola Defensa de la Llingua Asturiana (XLDA). 

"La situación muestra que l'anunciu d'Orejas –en referencia a la incorporación del idioma en nos informativos de TPA de manera "gradual"– nun ye más qu'una cortina de fumu pa disimular una programación qu'incumple la Llei d'Usu y los principios rectores de RTPA, que señalen que l'asturianu ha tar presente nel so funcionamientu normal como reflexu de la garantía del derechu de la ciudadanía a disponer de medios de comunicación social n'asturianu", asegura la organización, que nun descarta que "d'equí a un añu veamos a Orejas diciendo que 'TPA Noticias' nun pue emitir información n'asturianu porque nun tienen redactores formaos pa facelo –anque sí los hai pa dar la información metereolóxica y el fútbol n'asturianu, pero tampoco nun se fai–".

Obligaciones del ente públicu pa cola llingua asturiana

Yá la XDLA denunciara nel so momentu, nel añu 2005, "que la convocatoria pública de pruebes selectives pa trabayadores de RTPA, onde nun se valoraba como méritu puntuable'l conocimientu d'asturianu, suponía que diba conformase una plantiya ensin la garantía de que l'idioma tuviera una presencia mínima". Amás, "nesti tiempu tampoco nun miraron de planificar la formación llingüística de xente de la plantiya interesao pa llevar a la práctica eses obligaciones que tien l'ente públicu pa col idioma", añade.

Dada la situación, "si la dirección de RTPA nun sabe o nun quier xestionar unos medios públicos comprometíos cola medría de les nuestres industries culturales, cola normalización llingüística y cola promoción del nuestru patrimoniu, ye'l momentu de que los sos responsables dimitan. Asturies, la so cultura, la so llingua y la so industria audiovisual nun puen esperar otros 16 años", reclama la XDLA.