La Ribera, Riosa y Morcín avancen nos sos espedientes toponímicos

A falta de revisar cuestiones de detalle, estos trés conceyos del centru d'Asturies tienen yá fecha la revisión de los sos nomes de llugar pola Xunta de Toponimia, qu'aconceyío ayeri nuna sesión itinerante de trabayu colos representantes de los trés conceyos, que mostraron una gran voluntá de collaboración y grande interés por recuperar los sos topónimos tradicionales. Según 'informó, nun va haber cambeos d'importancia sobre'l nomenclator de l'Academia de la Llingua Asturiana pa estos tres conceyos, anque evidentemente sí que va habelos sobre les formes toponímiques que s'emplegaron hasta agora, lo mesmo que tamién van enxertase dellos topónimos menores que nun taben reconocíos hasta agora.

La propuesta de la Xunta de Toponimia pide que desapaeza la forma "Ribera de Arriba" pa referise al conceyu en que s'asitien les centrales térmiques d'HC y que recupere'l so nome tradicional "La Ribera" mientres que la capital del conceyu perdería la preposición "de" pa pasar a ser "Soto Ribera". Nel casu de Morcín pasaríase de Santa Eulalia a Santolaya pa denominar a la capital, mientres que la capital de Riosa va ser como siempre "La Vega".