La Ría de Navia, estrada de pexes muertos

La Ría de Navia amaneció esti fin de selmana estrada de pexes muertos, un fenómenu que tien estrañada a tola comunidá del occidente astur y tamién a los científicos qu'estudien el casu, pal que nun alcuentren una esplicación evidente.

Según esplicó Luis Laria, director del Centru d'Estudiu y Protección de les Especies Marines (CEPESMA), los primeros pexes muertos apaecieron el vienres, pero'l fenómenu entamó a más pequeña escala la nueche del miércoles al xueves per partes del ríu más abegoses de llegar a elles, espardiéndose per cinco kilómetros de ría a lo llargo del xueves y del fin de selmana hasta'l domingu, en que dexaron de morrer animales. La contaminación llevó per delantre cásique toles especies qu'alcontró, ensin facer distingos. Según Luis Laria, cerca del 80% de los pexes muertos que s'atroparon yeren muiles, un animal enforma duru y que suel aguantar en llugares contaminaos onde otros pexes nun son quien a sobrevivir, lo que diz muncho de la gravedá del axente contaminante. Amás de pexes, atopóse tamién una llóndriga, especie protexía, que taba yá pa morrer, y tamién pue haber bayura de pexes muertos que fundieren en cuenta de salir a flote. La contaminación dañó tamién a los crustáceos de les orielles, y bien de los pexes que s'atroparon taben yá mui descompuestos.

La causa de la contaminación entovía ye un misteriu ensin esclariar y nel que s'axunten causes distintes. Luis Laria llamentose de qu'hasta'l domingu, cuando la contaminación yá taba marchando, nun se sacaron muestres d'agua pa llevar a analizar, colo que va ser más difícil sacar conclusiones, anque pa elli la gran dulda ye saber si la contaminación foi por culpa d'un vertíu puntual o si vieno de l'acumulación de vertíos contaminantes que lleven años posando na ría y que bien pudieron facese más dañibles por dellos factores como la temperatura o l'estancamientu del agua.

La papelera de Navia apaez como la primer sospechosa por ser la instalación industrial que más vierte al Navia, pero Laria esplicó que ye difícil rellacionar a la fábrica d'Ence con esti casu en cuantes que les muertes entamaron nuna parte del ríu bastante más p'atrás d'au ta la papelera, colo que'l vertíu pudo venir d'otra industria.

El responsable del Cepesma apuntó dellos factores que pudieron influyir nel casu y colos que trabayen como hipótesis. En primer llugar, el fechu de que la papelera de Navia tea estos díes en parada técnica pudo forzar la falta de renovación d'agua al nun trabayar la presa d'Arbón, qu'apurre l'agua que precisa la papelera. Esta falta d'agua nuevo pudo ser una de les causes xunta la xuba de la temperatura, que pudo tamién influyir pa que menguare la tasa d'osíxenu nel agua, afogando a los pexes y esconsoñando tamién los contaminantes qu'hai na ría. De ser asina, al paecer de Luis Laria, sedría peor que si la contaminación viniere d'un vertíu puntual, en cuantes que demostraría que la ría taría atacada mui seriamente pola carga de vertíos que recibe.