La Ría d'Avilés recibe otru barcu peligrosu

Depués del pasu per Asturies del Nikolas, l'Alcudia y l'Aramo, la riestra de barcos peligrosos y en males condiciones que lleguen a los puertos asturianos recibe esta selmana una nueva aportación cola entrada al Puertu d'Avilés del "Metilo", que va atracar nel muelle de Raíces con 6.300 Tm.d'ácidu sulfúrico. Propiedá de Química naviera, el Metilo ye un buque que salió en 1983 de los astilleros vascos de Ruiz de Velasco y que lleva dando problemes bien gordos en toles inspecciones que-y van faciendo de va tres años p'acá.

N'abril del 2.000, el Metilo yá tenía un historial de dos detenciones sigún la llista del MOU (Paris Memorandum of Understanding on Port State Control), pero de va unos meses p'acá esti barcu ta batiendo tolos récords negativos, llegando a tenelu les autoridaes nueve díes reteníu nel puertu holandés de Rotterdam en payares del 2.002 porque-y sacaren 42 faltes, afectando siete d'elles a la seguranza de la navegación y seyes más al anexu ún del conveniu internacional Marpol de contaminación por hidrocarburos. Ecoloxistes n'Acción tien una páxina especial onde ta rexistrando tola información sobre estos barcos y na que pues alcontrar más información sobre'l "Metilo"