La revista "Lliteratura" presenta'l so númberu de primavera

L'Academia de la Llingua asoleyó esta selmana'l númberu 23 de la revista Lliteratura. Esta revista que dirixe'l críticu lliterariu Xosé Bolado incluye na estaya de narrativa testos de Miguel Rojo, Carmen Gómez Ojea y Iris Díaz Trancho. Marisa López Diz, Xosé Bolado y Lourdes Álvarez son los autores de poesía qu'apaecen nes fueyes d'esti "Lliteratura" de primavera, mientres que Paz Fonticiella entrevista al músicu y compositor Ramón Prada.

La estaya acutada pal ensayu dedícase-y n'esclusiva a la escritora María Teresa González con motivu de los 10 años del so fallecimientu, inxertándose escritos sobre la so obra de Vicente García Oliva y Francisco Álvarez Velasco. Na sección "varia" Antonio Alonso de la Torre fai un estudiu comparativu ente la obra d'Ana Vanessa Gutiérrez y la de l'artista plástica Natalia Pastor, mientres qu'Ignaciu Llope fai crítica de testos de la obra poética "Cuantayá que Dios fuxó" de Susana Rodríguez Sela y les noveles "Parque temáticu" de Xosé Nel Riesgo y "L'inmoral" de Xulio Vixil.