La revista La Sidra convoca la sesta edición del so concursu de semeyes

Yá ta abiertu’l plazu pa participar nel VI Concursu de Semeyes La Sidra pa obres rellacionaes cola sidra, la mazana y los sos derivaos. La xente interesao en participar nesta iniciativa tienen hasta’l 1 de payares pa unviar los sos trabayos.

Esti concursu ta destináu tanto a profesionales de la fotografía como a aficionaos y tien un primer premiu de 600 euros (500 en metálico y 100 en llibros). Tamién van recibir recompensa’l segundu (350, 300 en metálico) y tercer (150, 100 en metálico) clasificaos. Como novedá d’esti añu, va haber un áccesit p’aquelles semeyes que tengan como protagonista de la so obra a Sidra JR, patrocinador del concursu. El premiu consistirá en dos caxes de sidra del llagar de L’Infanzón.

El máximu de semeyes que se pue presentar ye de cinco por autor, toes en formatu dixital. Según marquen les bases del concursu, les fotografíes remitiránse a la direición infolasidra@gmail.com “en formatu estruyíu en JPG y en tou casu con un resolvimientu de 254 ppp y un tamañu de 50x70 cm, ensin marcos, tando la imaxe a sangre nel llenzu”. Nel corréu electrónicu ha de figurar nome y direición del autor, númberu de teléfonu y testu indicativu de pies de semeya o semeyes. Na edición anterior, na que participaron 145 persones con 563 semeyes, el trunfu viaxó pa Inglaterra. Bill Bradshaw resultó ganador con ‘Falling apples’, fotografía que muestra decenes de mazanes cayendo d’un pumar.