La revista dixital ‘Ciencies’ algama 10 númberos de divulgación n'asturianu

|
Revista 'Ciencies' númberu 10

‘Ciencies. Cartafueyos Asturianos de Ciencia y Teunoloxía’ llega esti 2020 al númberu 10. La revista dixital qu’asoleya l’Academia de la Llingua Asturiana (ALLA) y dirixe Carlos Lastra dedica la portada d’esti exemplar a l’aviespa asiática por un artículu firmáu por Andrés Arias Rodríguez sobre esta especie invasora.

Na plataforma de revistes de la Universidá d’Uviéu REUNIDO yá pue consultase’l númberu nuevu de ‘Ciencies’. Esti númberu, el 10, inclúi un total de seis trabayos en llingua asturiana que toquen diferentes campos científicos.

‘Otru vecín peligrosu ya imposible de desaniciar n’Asturies: Vespa velutina (10 años d’una invasión en volanderes’, d’Arias, del Departamentu de Bioloxía d’Organismos y Sistemes (Zooloxía) de la Universidá d’Uviéu, ocupa la portada siguiendo la llinia de númberos anteriores. Asina, l’añu pasáu dedicóse al plumberu de La Pampa, y hai trés, a especies invasores, nesti casu concretu a plantes.

Diego Álvarez Lao, del Departamentu de Xeoloxía (Palentoloxía), abre la revista con ‘Los grandes mamíferos del Cuaternariu d’Asturies’, que sigue con ‘Un investigador clave na conocencia de la Botánica d’Asturias. José Antonio Fernández Prieto (1950-2019)’, d’Eduardo Cires, del Departamentu de Bioloxía d’Organismos y Sistemes (Botánica), y ‘In memoriam de Salvador Rivas Martínez (16-VII-1935/27-VIII-2020) Fitosociólogu universal, alpinista reconocíu y maestru de botánicos’, de Tomás Emilio Díaz González, caderalgu de Botánica. Tres el trabayu sobre’l tártagu asiáticu, completen el númberu l’artículu en gallego-asturiano ‘A NAVE de Las Aceñas. Un proyecto ilusionao dos 90 en Navia’, a cargu de Bernardo Busto, inxenieru industrial d’ArcelorMittal, y ‘Tres desafíos pa la Enfermería del futuru: espíritu entamador, cambéu climáticu y ferramientes informátiques’, firmáu por Manuel Germán García Benito, graduáu n’Enfermería.

AdxuntuTamañu
Image icon Portada númberu 10 de 'Ciencies'285.21 KB
Contador Estadistiques