La revista británica ‘Folklore’ dedica la so portada a Asturies

|
Portada 'Folklore' Asturies

‘Folklore’, revista británica fundada nel 1878 como 'Folk-Lore Record', dedica esti avientu la so portada a Asturies. Cristobo de Milio Carrín, investigador de la Fundación Belenos, espubliza nesti númberu un artículu sobre la mitoloxía y les creyencies populares del noroeste ibéricu, centráu sobre manera nel nuesu país.

‘Winter Crones and Bread-Givers: The Northern Iberian Vieya’ ye’l nome del trabayu que firma José Cristóbal García Pérez col so nomatu habitual. Nella pescuda alredor “d’una figura mitolóxica poco conocía, la Vieya, una xiganta qu’apaez nel cumal de los montes, que remana el tiempu atmosféricu, especialmente les ñevaraes, ya que puede ser arrogante ya regalar bollos de pan a los neños”, esplica.

“Una de les afirmaciones más llamaderes del artículu ye qu’esti personax sal de la categoría de xana o encantu, ya pue considerase una verdadera diosa”, adelanta l’autor, qu’añade que l’artículu se centra na convivencia ya’l solapamientu ente les creyencies populares ya la relixón oficial, nes interferencies ente dambes ya tamién, na crisis na cultura tradicional per aciu del despoblamientu rural ya del impautu de los medios de comunicación na tresmisión de la cultura oral”. La revista qu’edita The Folklore Society, con sede en Londres, una de les más nomaes nel so campu a nivel mundial, dedica amás la portada del númberu 4 del volume 131 a Asturies con una semeya d’un teitu de Cangas del Narcea que fotografió Fritz Krüger nel 1927.

AdxuntuTamañu
Image icon Portada 'Folklore' Asturies completa286.59 KB
Contador Estadistiques