La República de Sudán del Sur yá ye un estáu independiente

Esti sábadu nació la República de Sudán del Sur como estáu soberanu. Tres el resultáu del referéndum d’independencia, nel que’l 98,83 por cientu de sursudaneses votó a favor, Sudán reconoció en febreru la dixebra del sur del Estáu.
 
La República de Sudán del Sur ye’l país númberu 53 d’África y va pasar pronto a ser el 193 de la Organización de Naciones Xuníes (ONX). La Xunión Europea, Estaos Xuníos, Rusia o Exiptu yá reconocieron a esti país que fai frontera con Sudán, Etiopía, Congo, Uganda, Kenia y la República Centroafricana nel que la mayoría de la so población, de raza negra, ye de relixón católica o tradicional. Estes persones celebraron el sábadu per tolo alto la dixebra del so territoriu del norte, de mayoría musulmán, anque Salva Kiir, presidente de l’autonomía y agora del país, vaya tener muncho trabayu per delantre pa revitalizar una república rica en petróleu onde reina la probeza. El 90 por cientu de los sursudanenses vive con menos d’un dólar diariu y el 85 por cientu ye analfabetu, según un informe de la ONX.
 
Ente los asistentes a la fiesta de la independencia destacó la presencia d’Omar Hassan al Bashir, presidente de Sudán, que nun punxo pegues a la decisión del sur d’independizase tres los resultaos del referéndum, anque munchos analistes acúsenlu d’apoyar la separación del Estáu pa convertir el norte nun país islámicu rexíu pola Sharia. Esti referéndum foi resultáu del alcuerdu de paz robláu ente’l norte y el sur de Sudán nel 2005 –que tamién dio autonomía al sur– tres mediu sieglu de conflictos armaos.