La Reina en Lorient, l'arguyu del occidente

N'Asturies.com falamos con Luis Feito, el director de la banda de gaites "La Reina del Truebano" quien nos contó la so esperiencia nel pasáu Festival Intercélticu de Lorient.

Pa "La Reina del Truebano" yera la primer vegada que diben al festival Intercélticu más importante más del mundu, y nun quedaron decepcionaos de la so participación nel festival. Lo primero que-yos sorprendió foi "lo importante que ye Asturies nel festival, tol mundu sabe onde ta Asturies, conocen la nuestra música non como n'otros festivales que tenemos visitaos. Pa nos ta claro que gran parte de la culpa que de qu'Asturies seya tan conocía per aquelles tierres ye del trabayu de Lisardo Lombardia, delegáu n'Asturies del Festival". Luis Feito ta "arguyosu de que seya una banda d'occidente, xunta la Banda de Gaites Candás, la que represente a Asturies nel festival, lo que ye una forma de revindicar l'arguyu del occidente asturianu dalgunes vegaes escaecíu".

Pa los trenta componentes de la banda foi toa una esperiencia participar nos conciertos, pasucais pela ciudá, nueches máxiques y folixes espontánees, "en cuantes saques una gaita ensiguida se t'arrimen músicos de tolos sitios pa tocar. Sorprendiónos lo fácil que ye comunicáse colos bretones o escoceses, anque nun sepas l'idioma del otru, pue haber una comunicación musical perfecta. Con esta comunicación nun hai duda de que los bretones son un pueblu hermanu del asturianu". Nes actuaciones ye cuando La Reina meyor pudo ver la bona recepción del públicu bretón, rescamplando la que ficieron nel Cabaret, "la xente nos conciertos foi increyible, escuchen, collaboren, participen, ye dicir, respuenden a lo que tas tocando, al final tuvimos que salir un par de vegaes pa facer unos bises énte la petición del públicu"

Pal futuru la Reina plantegáse agora siguir trabayando, tocando, y cuando la cosa tea madura sacar el so segundu discu dempués del debú que supunxo Xalea Real.