La reforma universitaria debátese n'Asturies

Dende güei entama n'Uviéu el I Alcuentru Estatal de Representantes d'Estudiantes, una cita que va durar hasta'l sábadu y a la que van acudir delegaciones de toles universidaes d'España y na que los estudiantes universitarios van debatir sobre la reforma de la LOU y'l procesu de creación del espaciu común universitariu européu como realidaes que van tresformar la universidá d'equí a la vuelta poco, amás de la creación d'un conseyu mediador ente les autoridaes universitaries y el colectivu d'estudiantes que tendría d'echar a andar pa últimos d'esti añu.

Al actu de presentación del alcuentru acudió'l rector Juan Vázquez, mientres qu'a les xornaes, de les que van salir propuestes concretes y consensuaes dende la parte de los estudiantes sobre la reforma de les titulaciones, van asistir tamién dos de los presidentes de les comisiones encargaes d'ellaborar el catálogu de carreres nueves adaptáu a la plantiya del Espaciu Européu Universitariu, el rector de la Universidá de Vigo Domingo do campo y Ángel Gabilondo Pujol, rector de l'Autónoma de Madrid, xunto col rector de la Universidá de Zaragoza, Felipe Petriz Calvo y el secretariu d'Estáu d'Universidaes y Investigación, l'asturianu Salvador Ordóñez.