La reducción de la velocidá máxima a 110 quilómetros per hora va mantenese cuatro meses

Alfredo Pérez Rubalcaba aseguró que la midida de reducir la velocidá máxima n’autopistes y autovíes a 110 quilómetros per hora va mantenese hasta’l 30 de xunu. De siguir la situación actual de norte d’África, podría prorrogase más tiempu.
 
El vicepresidente primeru del Gobiernu estatal sorrayó güei que “si dientro de cuatro meses la situación lo permite vamos volver a la normalidá que ye 120; si non lo permite, vamos tener que prorrogalo”. Rubalcaba calcó en que se trata d'una midida “escepcional y transitoria” que nun tien que ver cola recaudación por multes. Nesti sen, añadió que, “por muncho que multara”, l’Executivu nun diba compensar lo que va dexar d'aforrase pola recaudación d'impuestos al baxase'l consumu del petroleu.
 
Otra manera, esta mañana tamién aprobáronse una ventena de midíes d'aforru enerxético “por responsabilidá” ante l'actual escenariu internacional y “por coherencia” coles polítiques yá entamaes pol Executivu, anunció'l ministru d'Industria, Miguel Sebastián. Tamién señaló que les midíes tán incluyíes en “trés grandes grupos” qu'afecten al tresporte y la movilidá, a la edificación y llume y, en tercer llugar, al consumu eléctricu. Amás, van dir acompañaes d'una campaña de concienciación a la ciudadanía sobre la necesidá de collaborar col aforru enerxético. El gastu total va ser de 1.151 millones d'euros, que van dir con cargu a la estratexa d'aforru y eficiencia enerxética que financien nun 80 por cientu les compañíes eléctriques. L’aforru en petroleu va ser del 5 por cientu, según los datos d’Industria.