La Rede de Normalización Llingüística entama una campaña sobre los productos de temporada

Baxo’l nome de ‘¿Qué mos toca...?’ la Rede de Normalización Llingüística nos Conceyos entama esti iviernu una campaña qu’amuesa los nomes n’asturianu de productos propios de cada estación del añu. Los cartelos, pensaos pa les redes sociales, tán adaptaos a les particularidaes llingüístiques de cada llugar.

Llimón, repuḷḷu, espinaques, ñabos-xorras, naranxas o cenahoria son dalgunos de los términos qu’apaecen nel que correspuende al iviernu, acompañaos d’una semeya identificativa. Entamada pol Conciyu Ḷḷena l’añu pasáu, la Rede lleva esta inciativa, la primera conxunta d’esti 2021, tamién a Xixón, Cangas del Narcea, Grau-Candamu, la Mancomunidá del Cabu Peñes (Carreño y Gozón) y la ‘Comarca de la Sidra’ (Bimenes, Cabranes, Colunga, Nava, Sariegu y Villaviciosa).

“La finalidá ye clara: asentar el vocabulariu propiu nel ámbitu del comerciu y fomentar actitúes responsables ente la xente consumidor”, espliquen. Asina, con esta campaña, los veceros van poder conocer tanto cuáles son productos de temporada como’l so nome n’asturianu.

Los cartelos tienen un diseñu común, pero tán adaptaos a cada llugar, incorporando particularidaes llingüístiques, “siempre en ficies d’un impactu social favoratible nos sos ámbitos d'influencia”. Acompáñase tamién d’un lema p’animar a mercar nel comerciu llocal.

Na imaxe superior, un cachu del cartelu correspondiente a Xixón. Sobre estes llinies, el de Ḷḷena.