La reclamación de dignidá pal asturianu tuvo presente na entrega de los Premios Lliterarios 2012

La gala d’entrega de los Premios Lliterarios 2012 sirvió pa que los escritores ganadores pidieran diginidá pal idioma y la so lliteratura. La conseyera Ana González nun acudió al actu, como s’anunciara, alegando una reunión pola Llei Wert.

Por esti motivu, foi Alejandro Jesús Calvo l’encargáu d’entregar los gallardones a los vencedores en caúna de les cinco estayes nos que se dividen los premios más importante de la lliteratura asturiana. El viceconseyeru de Cultura y Deporte pidió perdón en nome de González por nun poder asistir a la Biblioteca Pública Xovellanos, espaciu escoyíu nesta ocasión pa la gala en sustitución del Palaciu d’Inclán Leiguarda d’Uviéu, por una reunión preparatoria de la Conferencia Sectorial d'Educación prevista pal vienres próximu.

Darréu, Ana María Fueyo procedió a la llectura de cáuna de les actes de los premios, valoraos en 4.000 euros –3.000 menos que l’añu pasáu–, y los ganadores pasaron ún por ún a recoyer una escultura de manes de Calvo y a dicir unes pallabres breves. El primeru en pasar a  pol troféu foi Javier Marinas, vencedor del IV Premiu Alfonso Iglesias de cómic por ‘Homes’. Na so intervención mostróse feliz por recibir el gallardón y destacó’l llabor del home que da nome al mesmu, “el Walt Disney asturianu’, del que se declaró siguidor dende pequeñu, cuando principió a dibuxar “monos a los 8 años”.

El discursu más contundente foi’l de Milio Rodríguez Cueto, ganador del V Premiu María Xosefa Canellada de lliteratura infantil y xuvenil por ‘Carne de melandru’. “Si quixera unviar esta obra a los Premios Nacionales de Literatura Infantil y Juvenil nun lo podría facer; sí en gallegu, una llingua mui paecía a la de nós. Eso nun ye xusto de nenguna manera. Ye una humillación y una vergoña pal conxuntu de los asturianos”, afirmó. Pela so parte, José Ángel Gayol, merecedor del XVIII Premiu Xuan María Acebal de poesía por ‘El llibru de les coses misteriores’, citó a Lorca –“poesía ye xuntar pallabres que nun esperabes xintar y que formen un misteriu”– y faló del “misteriu de la llingua asturiana”. “El camín ye dignificala, yá que nun hai oficialidá. Confórmome colo mínimo”, añadió.

El siguiente en pasar a recoyer la so escultura foi Xulio Arbesú, ganador del XVIII Premiu Máximo Fuertes Acevedo d'ensayu por ‘Los deseos del dineru’, qu’animó a los escritores asturianos a trabayar l’ensayu. Tamién destacó’l llabor de los autores en llingua asturiana, “que nun escriben por perres, sinón por vocación”, y señaló qu’espera que’l so trabayu, una vegada s’espublice, sirva “p’aumentar la capación de reflexón de cada persona” sobre’l dineru. Pa terminar, Quique Faes, vencedor del XXXIII Premiu Xosefa Xovellanos de novela por ‘La vida increíble’, nomó nel so discursu a Francisco Carantoña y al Padre Patac y calificó de “anomalía” la falta de cooficialidá, pa depués asegurar que “tovía tamos a tiempu” de sacar al idioma “de la corte”.

Reivindicaciones "llexítimes"

Calvo encargóse de zarrar l’actu, momentu nel qu’emponderó la importancia de los premios “pa fomentar la normalidá del usu del idioma” y nel que se refirió a les reivindicaciones sentíes nel actu como “llexítimes”. Por último, tresmitió a los ganadores el so deséu de que los gallardones de la conseyería “sían el capítulu primeru d’unes trayeutories lliteraries llargues y esitoses”.

Crítiques pola ausencia d’autoridaes

Iniciativa pol Asturianu llamentó “el menospreciu institucional” a los Premios Lliterarios. “Un añu más el Gobiernu d’Asturies entrega los sos Premios Lliterarios n’asturianu, los máximos gallardones institucionales del país, y failo ensin presencia institucional d’importancia”, apunten dende’l coleutivu que trabaya pola normalización del idioma, qu’entruga “¿ónde ta’l presidente Javier Fernández nun actu de la importancia d’estos premios?”. “Amás de nun tar el presidente d’Asturies, como ye vezu, esti añu nin siquiera se cuntó cola asistencia de la conseyera de Cultura”, añaden, pa depués apuntar que sería inxustificable que’l ministru de Cultura nun asistiera a los Premios Nacionales de Literatura, “equivalente estatal d’estos gallardones”.

“Ésti nun ye’l primer menospreciu de la conseyera de Cultura a los gallardonaos con estos premios. Yá a finales del 2012 llegó media hora tarde a la presentación de les obres ganadores na so edición anterior y nun participó del actu”, recuerden dende Iniciativa pol Asturianu, que considera que’l Gobiernu “habría facer un esfuerciu por promocionar la lliteratura asturiana cola presencia d’una mayor representación institucional”, reducida nesta ocasión a l’asistencia “d’un viceconseyeru”. Otra manera, esta organización quier felicitar a los ganadores y “súmase a la so reivindicación, fecha nel actu, d’oficialidá pa la llingua asturiana, y de que nes convocatories de los Premios Nacionales de Literatura puedan participar obres n’asturianu, como pasa col restu de llingües oficiales del estáu”.

Na semeya, Rodríguez Cueto avérase al micrófonu pa intervenir, depués de recibir la escultura de manes de Calvo, mientres Fueyo aplaude.