La reciella canta en Xente Mozo

Nel discu "Xente Mozo", editáu pola casa de discos "Ámbitu", topamos una esbilla de temes propios de los neños y neñes, la música de la infancia cantada por neños

Los cantares tradicionales de los xuegos, bailles, corros y demás ocupaciones de los neños y neñes, fueron la banda sonora de la mocedá de muncha xente. Soniquetes que d'una manera o d'otra tuvieron o tán presentes nes nuestres vides. Nel discu de "Xente Mozo" la discográfica "Ámbitu" presentanos venti cantares asturianos tradicionales cantaos pola xeneración que tien nes sos manes que nun caigan nel escaezu. D'esta manera tenemos un preséu en forma discu pa enseñar y escuchar cantares como "Riu Verde", "Ónde tán les llaves", "Tengo un vieyu en casa", "Mambrunu"," o la "Xiringosa". Como se puede ver, les melodíes del discu son tradicionales, vieyes y modernes, delles son propies d'Asturies, anque munches otres compártense colos repertorios de Francia, España o Portugal.