La Real Academia Galega pide'l mesmu tratu pal gallego-asturiano que pal asturianu na reforma

Adrián Barbón respuende que "naide va dicinos lo que tenemos que recoyer nel nuesu Estatutu".

La Real Academia Galega (RAG), institución encargada d'afitar les normes del gallegu, asoleyó un informe de 15 páxines "sobre'l gallegu d'Asturies y la so oficialidá na reforma del Estatutu d'Autonomía del Principáu" en llingua gallega, asturiana y castellana. Nel mesmu amuesa'l so deséu de que el "Parlamentu del Principáu apruebe na reforma del so Estatutu d’Autonomía la declaración d’oficialidá de les dos llingües propies d’Asturies, el gallegu y l’asturianu. Y que na posterior llei d’usu que se prevé nesi puntu 7, el gallegu, na variedá eonaviega, seya oficial en tol territoriu del Principáu d’Asturies, pa que los sos falantes tengan los mesmos derechos que los del asturianu, como en Cataluña los tienen los falantes de la llingua occitana, denominada aranés n’Arán".

Tamién fai referencia al glotónimu eonaviego, emplegáu agora pol Gobiernu d'Asturies en sustitución de gallego-asturiano, "que paez tener como finalidá facer invisible la esistencia del gallegu na zona". Pa finar, especifica que "nun ye función de la Real Academia Galega intervenir n’asuntos de tipu políticu, que son responsabilidá los Gobiernos de les comunidaes respeutives; pero ye función d’ella recorda-yos qu’una llingua ye un patrimoniu cultural merecedor de ser perpetuáu y que sería más positivu pa esa perdurabilidá una política de cooperación y non una política de confrontación".

La RAG unvió esti informe, aprobáu nel Plenu últimu ordinariu, a los grupos parllamentarios de la Xunta Xeneral y al presidente Barbón, que nun tardó en responder al facer la institución gallega públicu esti documentu. En castellanu afirmó que "la reforma del Estatutu d'Autonomía negóciase n'Asturies d'alcuerdu al sentir de los grupos políticos, entidaes y asociaciones asturianes. Naide va dicinos, dende cualquier otra Comunidá y por muncho respetu que-yos tengamos, lo que tenemos que recoyer nel nuesu Estatutu".

Semeya de Certo Xornal baxo llicencia CC BY 2.0.