La RAG nomó académicu a Varela Aenlle

La Real Academia Galega nomó esti fin de selmana a los académicos nuevos pa la defensa del "Galego Esterior" ente ellos a Carlos Varela Aenlle, que tien por ámbitu d'acción la fastera del Navia-Eo.

El nuevu académicu Carlos Varela fizo un discursu nel qu'emponderó la trayectoria del movimientu galleguista nel occidente asturianu y nel que reclamó sofitu pa que la normalización del gallegu avance nel Navia-Eo. Varela condenó a l'asociación asturiana Xeira, que defende l'autonomía de la fala eonaviega "por buscar siempre una norma lo más diferente posible a la del gallegu.

Buscando repercusión asturiana pal actu, la RAG llamó a los alcaldes asturianos del Navia-Eo convidándolos al actu d'investidura de los académicos, un convide que nun tuvo repercusión. Los académicos gallegos apuntaron delles llinies de trabayu pa implicase activamente nel espardimientu de les señes d'identidá gallegues nel occidente asturianu, y asina l'académicu gallegu pol Bierzo Héctor Silveiro, pidió la creación d'un "Centru pa la Normalización Llingüística del gallegu fuera de les fronteres alministratives" proponiendo como sé del organismu la casa del sacerdote ilustráu del sieglu XVIII Martín Sarmiento en Villafranca del Bierzo.

Afondando nesta llinia de trabayu, el tamién académicu Francisco Fernández Rei señaló que yera preciso que la radio y televisión autonómiques de Galicia s'implicaren na cobertura tecnolóxica y tamién na informativa nel Navia-Eo y demás territorios que la RAG defende como gallegofalantes, pidiendo que la RTVGA ponga corresponsales específicos nel Navia-Eo.

Les tesis de Fernández Rei aválenles dende la fastera llionesa de El Bierzo l'asociación Fala Ceibe de El Bierzo y la Fundación Vía Galego. Nun comunicáu asoleyáu güei, estes dos organizaciones galleguistes piden que la señal de la RTVGA llegue "a les tierres gallegófones del Eo-Navia güei baxo alministración asturiana y onde viven alredor de 50.000 gallegofalantes".