La programación infantil n’asturianu en TPA en Navidá: “cero minutos”

|
Animalada Xabaz

La Xunta pola Defensa de la Llingua Asturiana (XDLA) denuncia que, a diferencia de lo qu’asocede con otres televisiones autonómiques de territorios con llingua propia, TPA dedicó “cero minutos a la emisión de programación infantil n'asturianu” esta Navidá. Les poques películes pa la reciella emitíes foron producciones “con un doblaxe al castellanu fechu por empreses madrilanes o catalanes”.

“Quier dicise, TPA dedicó'l so presupuestu a ufrir los mesmos conteníos que puen vese en televisiones como Clan, Boing, Neox o Cartoon Network”, critica esti coleutivu, que llamenta “que nada cambió na radiotelevisión pública nos últimos dos años”. Asina apunta que “nun hai programación infantil n'asturianu, la toponimia oficial ta marxinada, namás s'emiten programes nel nuestru idioma si paga la Conseyería de Cultura y l'asturianu ta vetao nos programes informativos y deportivos. Too eso a pesar de les palabres bones del Gobiernu actual hacia'l nuestru patrimoniu llingüísticu”.

“Mentes el restu de Gobiernos autonómicos trabayen pa llevar les sos llingües a les plataformes de conteníos baxo demanda, equí RTPA nin cumple les sos obligaciones estatutaries y nun atiende al públicu más mozo. L'Estatutu y la mesma Llei d'Usu dicen que los medios de comunicación públicos tienen que tener una presencia ‘amañosa’ de les llingües propies”, recuerda la XDLA.

El coleutivu cívícu rescampla que “pa iguar esta situación nun fai falta esperar a la oficialidá, namás fai falta voluntá política. Pel momentu, en dos años de llexislatura d’Adrián Barbón la voluntá amosada sigue siendo la mesma que na llexislatura de Javier Fernández: cero voluntá y, en consecuencia, cero minutos”. Estes selmanes emitiéronse en TPA llargumetraxes como 'Cigüeñas' o 'Batman, la legopelícula', toes en castellanu.

Na semeya, personaxes de 'Animalada Xabaz', únicu programa infantil n'asturianu emitíu en TPA nel 2021. Foi ún de los siete proyeutos escoyíos na convocatoria ‘Asturies crea cultura / Asturies crea sinerxes’ entamada pola Conseyería de Cultura, Política Llingüística y Turismu y RTPA.

Contador Estadistiques