La primer vaca lloca americana esfarrapla la cotización de Mc Donalds

Dempués de tres años de perdes bursátiles el 2003 ye l'entamu d´un nuevu ciclu alcista nes bolses. La recuperanza económica internacional xunta unes meyores perspectives xeopolítiques emburrien a los inversores a tornar a la renta variable. La Bolsa de Madrid medró asgaya con una xuba del 25% nel selectivu Ibex-35. Na mesma llínia tuvieron Francfort (+35%), el Nasdaq, (+44%) y Hong Kong (+32%). La depreciación del dólar a favor del euru, la xuba histórica del oru y les operaciones corporatives pesllaron un añu mui bonu pa la comunidá inversora nel que l'escándalu Parmalat punxo la nota d'incertidume

La selmana foi mui curtia poles fiestes navideñes. De toles formes los inversores l'actividá, y solo la Bolsa de Milán peslló en negativo pol grave escándalu financieru de la Parmalat. En Wall Street tampoco nun pintaron bien les coses pola anuncia de la primer vaca lloca nos Estaos Xuníos. Compañies como McDonalds vieron como los sos valores s'esbarrumblaben nos parqués, mientres les esportaciones de vacunu d´Estaos Xuníos baxaben un 90%.

N'España, añu perbonu pa la Bolsa de Madrid con ganancies asgaya en dellos valores. La selmana pasada l´Ibex algamó los 7.696,50 puntos, lo que supón el novenu másimu anual. Ente los valores que más perdes tuvieron foron Sogecable y Corporación Mapfre con cayíes penriba´l 2%, mientres nel llau de les ganancies destaquen Gas Natural y Arcelor con xubes penriba´l 2,20%. Tamién pesllaron en positivo BBVA, BSCH, Iberdrola y Endesa. El Grupu Telefónica tuvo una selmana mui positiva con xubes importantes na so matriz. L´anuncia de la selmana foi la compra del Banco Atlántico pol Banco Sabadell, propietariu tamién del Banco Herrero y del desapaecíu "Banco de Asturias" y que s'asitia como cuarta entidá financiera del Estáu. Según dellos analistes, el mapa bancariu sigue moviéndose, ya que´l Bankinter podría mercar el Guipuzcoano o el Pastor. Amás dellos economistes yá falen de qu'una fusión del BBVA o SCH con un gran bancu européu nun ta mui lloñe.

L´euru asitióse nos 1,2408 dólares, aselando la fuerte xuba de los últimos díes. Asina'l dólar tien yá una depreciación anual respective al euru d´un 18%. Nel mercáu del petróleu, el preciu del barril Brent trancó raspiando los 30 dólares. A lo llargo del 2003 el petróleu osciló ente los 23 dólares barrill y los 33 dólares, con cotizaciones mui condicionaes pola situación bélica n'Iraq. L´oru foi la gran inversión del añu, algamando un preciu de cerca de 410 dólares onza, la mayor xuba dende 1996. Esti añu 2003 tamién foi perimportante nel mercáu de renta fixo polos baxos tipos d´interés na Zona Euru y nos Estaos Xuníos. Anguaño, el tipu d´interés marcáu pol BCE ye del 2% mentantu qu'al otru llau del Atlánticu la Reserva Federal púnxolos nel 1%. Ensin dulda, l'añu va ser nel que xuban los tipos d'interés, polo menos mediu puntu.