La primer novela n’asturianu occidental escosa la tirada en dos meses

"Tiempos de nublina" la primer novela del escritor de Cangas del Narcea Xose María Fernández, tamién conocíu pol alcuñu de "Chema'l de Bimeda" ta acabante d'escosar la tirada de la so primer edición. Dase la circunstancia de que "Tiempos de nublina" ye tamién la primer novela de la historia escrita n'asturianu occidental, una variante qu'hasta agora namás quedare constancia lliteraria d'ella en cuentos y poemes, pero que tien una gran aceptación por parte del públicu, tanto que la primer edición d'esta obra vendióse entera en menos de trés meses.

L'autor de Cangas contó a Asturies.com que ta mui contentu cola repercusión de la obra y con dalgunes anécdotes que pasaron nestos meses, como'l fechu de qu'a la presentación de la obra en Madrid enllenare'l salón d'actos del Centru Asturianu de la capital española, onde se vendieron más de cien exemplares del llibru, anque, lóxicamente, lo más de la venta fízose nel occidente, sobremanera en Cangas.

"Tiempos de nublina" pon l'acción nel pueblu de Castru Furáu, un llugar imaxinariu nel suroccidente d'Asturies nel que la tranquilidá desapaez cola llegada d'un coche qu'anuncia la Guerra Civil. Dende esi intre la vida del pueblu va dir degradándose hasta que'l final de la guerra diga quien son los ganadores y quien son los vencíos. Pente medies, la Guerra impón les sos condiciones a los aldeanos, enforma distintes a les que manda nes ciudaes. Dende la esperiencia de los que tienen que fuxir pa les brañes hasta la llamada a files de los más mozos o los fusilamientos, too ello col únicu contactu col esterior d'una radio na que los rapazos de Castru Furáu sienten la emisión en castellanu de la BBC.

El volume, escritu n'asturianu occidental acordies cola normativa de l'Academia de la Llingua, vien acompañáu d'un CD multimedia nel que pue descargase una versión en castellanu del testu de la obra. D'otra manera "Tiempos de nublina" supón el regresu de Xose María Rodríguez (Bimeda, Cangas del Narcea) a la lliteratura dempués d'un silenciu de más de venti años, cuando'l Conceyu d'Asturies en Madrid perdió la so actividá.

Precisamente'l fallecimientu de Xosé Álvarez "Pin" ún de los fundadores d'aquel garapiellu d'activos asturianistes na capital d'España foi'l guañu dende'l qu'atoñó otra vuelta l'enfotu de munchos de los antiguos componentes d'esta histórica iniciativa cultural asturiana, sobremanera los del occidente asturianu, que va poco participaron munchos d'ellos na primer Xunta d'Escritores n'Asturianu Occidental. El mesmu Xosé maría reconoz la importancia d'aquel alcuentru p'animar a volver a escribir a toa una xeneración, pero apunta qu'elli yá tenía preparáu esti llibru primero d'aquello.

D'otra manera, Chema dio anuncia de que ta preparándose la reedición de los sos dos volumes antiguos de cuentos"Nueite de filandón" (1982) y "Xuan Canas. Nial d'alcurdanzas "(1983) nos que recrea les formes narratives de la lliteratura oral tradicional.