La primer foca ñacida n’Asturies, casu únicu na península

Esti fin de selmana, la costa de Tapia vio un acontecimientu que nunca nun se diere na costa del cantábricu nin tampoco nel restu de la península ibérica, el ñacimientu d'una foca de cascu.

Na mañana del vienres, na playa de Serantes taben una foca acabante parir y la cría. La sorpresa del afayu correspondió-yos al retén de la Cruz Roxa encargáu del salvamentu na playa, que darréu llamaron a la Coordinadora pal Estudiu y Protección de les Especies Marines (Cepesma).

La cría mide cerca de 50 centímetros y pesa menosde lo normal, unos datos de pesu y midida que lleven a los especialistes del Cepesma a concluyir que l'animal ñació con adelantu. Sicasí, esti fin de selmana yá se comprobó que l'animal, que pasa per un momentu críticu pa la so supervivencia, ye a nadar curioso y incluso s'atreve dacuando a somerguyase cola madre, un exemplar de cerca de 300 kilos de pesu, lo que diz muncho de l'adaptación de la cría y da grandes garantíes de que pueda salir alantre.

La Guía de mamíferos d'Europa de Gordon Corbet y Denys Ovenden diz testualmente que les críes de la foca de cascu "nacen nel xelu" y la guía "Sea mammals of the world" de Bernard Stonehouse

asitia los criaderos de foca de cascu na Tierra de Baffin (nel Canadá) y al norte de la Islla de Jan Mayen, dafechu nel círculu polar, espardiéndose la zona d'habitat hasta Islandia, Spitzbergen o como muncho Noruega o la punta más al norte de les islles britániques y dándose la presencia ocasional d'elles nel Cantábricu, pero siempres pa la seronda o más p'alantre, nunca nun en temporada de cría, como ye'l casu.

Anque los criaderos de foca de cascu más allegaos a la nuestra costa tean anguaño a más de 3.500 kilómetros y la so presencia ente nosotros seya testimonial, l'otru nome asturianu de la foca ye'l de llobu marín, una denominación qu'apaez en bien de topónimos costeros, mesmamente en La L.lubar en Vil.lamouros (conceyu Valdés), un topónimu que pue derivase d'un antiguu llugar en que vivíen o añeraben les foques, lo que demostraría una rellación de vieyo ente Asturies y estos animales.

Por cortesía de Cepesma reproducimos estes trés semeyes en que pue vese a la foca acabante ñacer y nes sos primeres salíes a la mar na redolada de Tapia. ( Foto 1, Foto 2, Foto 3)