La presentación del nuevu plan rector d'usu y xestión del P. N. de Picos d'Europa entamará en setiembre

|
Picos d'Europa

La comisión de xestión prepara les actividaes pa conmemorar en 2018 el centenariu de la declaración del espaciu compartíu poles trés comunidaes autónomes

La comisión de xestión del Parque Nacional de los Picos d'Europa (PNPE) aprobó güei en Santander el calendariu del procesu de participación pública pa la tramitación del Plan Rector d'Usu y Xestión (PRUG) d'esti espaciu protexíu. Na primera quincena de setiembre, prevese realizar la presentación pública del procesu a los alcaldes y miembros del patronatu.

Este ye unu de los asuntos trataos por esti órganu nuna xunta presidida pol conseyeru de Mediu Rural, Pesca y Alimentación del Gobiernu de Cantabria, Jesús Oria, y que compartió cola conseyera de Desenvolvimientu Rural y Recursos Naturales del Principáu d'Asturies, María Jesús Álvarez, y el so homólogu de Castiella y Lleón, Juan Carlos Suárez-Quiñones. Tamién intervinieron el directores xenerales responsables de les tres autonomíes, codirectores del parque y representantes del Ministeriu de Mediu Ambiente. Tamién s'alcordó la creación d'un grupu de trabayu p'afaer los estatutos a la nueva Llei de Parques Nacionales aprobada apocayá. 

Per otru llau, diose'l vistu bonu al plan de control de jabalíes pal periodu 2016-2017, que va significar la captura de 110 exemplares en tol territoriu del Parque. Los controles van facer cola participación de cazadores locales. La comisión de xestión tamién respuende por una obra d'accesu a La Vega de les Mantegas, n'Onís, y prepara les actividaes pa conmemorar en 2018 el centenariu de la declaración del espaciu compartíu poles trés comunidaes autónomes. 

Igualmente, alcordóse l'ampliación del plan d'actividaes, tendentes a la execución de les obres de reconstrucción de la Ponte del Molín de Cordiñanes (Posada de Valdeón), que van suponer una inversión de 250.000 euros, al pie de l'alquisición de nuevos equipos portátiles de radiocomunicación y de material rellacionáu col proyectu LIFE+ pal caltenimientu del urogallo cantábricu y del so hábitat.

Recuperación de praderíes

La comisión aprobó, coles mesmes, un proyectu financiáu pola UE pa la recuperación de praderíes, dientro de la convocatoria de Interreg-Sudoe na que participa'l parque nacional, por importe total de 1.166.000 euros, que cuerre a cargu nun 75% de la iniciativa europea.

Destaca especialmente la medría de l'actividá en grupos nos centros d'interpretación y de sensibilización ambiental con 214 grupos y un total 9.632 persones atendíes, 1.300 más que nel mesmu periodu del pasáu añu.

Centenariu del Parque

Tamién foi presentáu un primer aproximamientu de les actividaes programaes en conmemoración del centenariu de la declaración del Parque Nacional del Monte de Cuadonga como primer parque nacional d'España, que va celebrase en 2018.

Los tres comunidaes autónomes alcordaron pidir al Estáu la so implicación ya incorporación a los actos de celebración, según la so collaboración na promoción de les actividaes al traviés del organismu estatal Acción Cultural Española y l'organismu autónomu Parques Nacionales. Na conmemoración tamién se va cuntar cola contribución d'empreses ya instituciones venceyaes al espaciu.

 

Contador Estadistiques