La prórroga presupuestaria lleva al Gobiernu a suprimir el ‘cheque-críu’ y a paralizar el Campus de la Salú

El Gobiernu ta alertando estos díes de les consecuencies de la prórroga presupuestaria na que ta Asturies tres el refugu del so proyeutu de cuentes na Xunta Xeneral. Asina, avisa que suprime'l ‘cheque-críu’ y que paraliza'l Campus de la Salú.

La conseyera d’Educación y Universidades, Ana Isabel Álvarez González, avisó güei nuna rueda de prensa xunto Argimiro Rodríguez, viceconseyeru d’Eduación y Formación Profesional, del parón "ensin fecha" del proyeutu del Campus de Ciencies de la Salú, "fundamental pa la reorganización de los espacios de la Universidá", asina como un empeoramientu de la calidá de la Formación Profesional (FP), que "nun va poder modernizase, nin incorporar títulos nuevos". Álvarez González avisó asina a populares y socialistes de les consecuencies de la prórroga pa un serviciu públicu "d’importancia vital pa la recuperación económica de la comunidá".

En concreto, indicó que’l so departamento va tener "dificultaes series" pa cumplir el compromisu d’asumir los gastos de funcionamientu de les escueles de 0 a 3 años nos conceyos y que nun va poder crear unidaes nueves nin dotar de recursos nuevos a les 64 que funcionarán esti cursu. D’igual forma, manifestó que trabayar col presupuestu del 2011 va obligar a la conseyería a renunciar a los casi seis millones d’euros de inversión presupuestaos para la construcción d’edificios y aules, como’l Colexu Príncipe de Asturias, en Tapia; el Centru Rural Asociáu de la Marina, en Villaviciosa; el Colexu Públicu Corredoria 3, n’Uviéu; y los institutos d’Educación Secundaria de La Corredoria y La Fresneda.

Xunto colo anterior, l’escenariu político-financieru nuevu taraza, según el Gobiernu, el millón d’euros adicionales previstu pa una planificación nueva de rutes de tresporte, poniendo en riesgu la prestación d’un servicio "sensible" qu’ha d’afrontar esti añu la renovación de parte de los sos 817 trayeutos, incluyíos los 319 que fai col Consorciu de Tresporte d’Asturies (CTA), qu’incrementaba nuna cantidá de 1,1 millones les perres destinaes nel 2011.

No que respeuta a les plantiyes, dambos responsables aseguraron que nun habrá pieslles de centros nin, polo tanto, merma de profesionales, anque’l viceconseyeru precisó que "que va ser una tarea difícil y delicada que toos cobren lo que tán cobrando". Nesti puntu alvirtió que’l cumplimiento de la sentencia que reconoz el derechu d’interinos y personal llaboral docente a cobrar los sexenios tardará más en ser efeutiva y quiénes quieran incorporase al denominado Plan d’Evaluación Docente tendrán que recurrir a la vía xudicial.

Por último, la conseyera opinó que la prórroga constitúi "una barrera difícilmente superable", anque reconoció que recurrirá a la tramitación de creitos estraordinarios pa tratar d’entamar proyeutos que, de lo contrario, "quedaríanse nel camín". "Too ye meyorable, pero pa meyorar hai que saber en qué y quiénes tuvieron la oportunidá d’aportar y, a la fin, decidieron optar por un presupuestu insuficiente dafechu", recriminó al PP y al PSOE.

Un déficit de 14 millones

La prórroga presupuestaria tamién lleva al Gobierno a preveer que l’aplicación de la Llei de Dependencia y el pagu del Salariu Social xenerará un déficit esti año de 14 millones, esto ye, una cantidá similar al del exerciciu anterior, según señaló Paloma Menéndez Prado, conseyera de Bienestar Social. Amás, la situación económica va impedir l’abonu de les ayudes al nacimientu, conocíes como 'cheque-críu'.

Menéndez Prado afirmó que’l Gobiernu atiende "a toles prestaciones por dependencia y salariu social", pero incidió nes dificultaes que conllevará’l mantenimientu d’esta prestación. "Tamos nuna situación complicada, porque esti gobiernu garantiza el pagu de les mesmes, polo que nos veremos obligaos a modificar otres partíes, y munches llinies de subvenciones nun llegarán a realizase", ente les que citó les dedicaes a actividaes d’asistencia a dependientes y mayores, que yá tienen una "presupuestación deficitaria" de trés millones d’euros.

N’Infraestructures, "faese imposible", anunció, "abrir el  centru de grandes discapacitaos de La Madalena (Avilés) y tampoco incrementar la tresferencia de 17 millones al ERA pa compensar la presupuestación irregular d’ingresos del exerciciu 2011". Tampoco será posible "completar la ocupación del Centru Polivalente de Recursos pa Mayores del Cristu, de Santa Teresea, y del Centru de Día de La Tenderina, la puesta en funcionamientu de la residencia de Sotiello-Morea, y l’incrementu de les places concertaes". Mentes, en vivienda, según la conseyera, "impídese la creación de la ayuda moza al alquiler prevista nel 2012, y nun se dispondrá de 2 millones d’euros pa la puya pa la construcción de viviendes de proteición en Colunga, Llanes, Nava, Ḷḷena y Cangas del Narcea”.

En conclusión, "la situación de prorrogar el presupuestu fai mui complicada la situación de la Conseyería de Bienestar Social", afirma Menéndez Prado que, darréu, criticó a socialistes y populares por llevar al Gobiernu a la prórroga. “Sorpréndenos enforma que’l PP votara a favor d’un presupuestu que l’año pasado refugaba, y que’l PSOE diga que son cuentes irreales, cuando irreales foron les qu’incluyeron nel so presupuestu nel 2011", añadió.