La popular Levy amuesa de forma gráfica'l so refugu al vetu de VOX en Xixón al asturianu

La conceyala en Madrid presidenta del distritu de Retiro citó un mensaxe en Twitter de Daniel Gutiérrez Granda, al que tamién reaicionó'l periodista de laSexta Iñaki López.

Andrea Levy, política catalana del Partido Popular (PP) a la que ye habitual ver per Xixón y que na llexislatura anterior encargóse del área de Cultura nel Ayuntamiento de Madrid, amosó'l so refugu nesta rede social al anunciu de vetu de VOX a los artistes qu'empleguen l'asturianu d'una manera mui gráfica. Foi a partir d'un tweet espublizáu pol que fora encargáu de Festexos na década de los 90 con Vicente Álvarez Areces na Alcaldía de Xixón nel qu'afirmaba que "la nueva Concejala de Festejos de Gijón, Sara Álvarez Rouco, militante de VOX declaro en Onda Cero Gijón que no programarán espectáculos de aquellos artistas que utilicen el asturiano en sus actuaciones. Hay que ser muy torpe para empezar poniendo vetos y límites".

Darréu completaría'l testu con un "a lo mejor es bueno y todo que VOX toque poder, puede que sea la mejor forma que pierdan su mística y que se vea que solo son una panda de zoquetes". Cuatro carines faciendo'l xestu de vomitar foi la reaición de Levy nel so Twitter, nel que tien 79.000 siguidores, al primer mensaxe.

Ente les respuestes a Gutiérrez Granda tamién se pudo ver la del vascu López, presentador xunto con Cristina Pardo, de 'Más vale tarde', qu'apuntó de forma irónica que "el bable también es ETA. Estaba claro".

Semeya de Levy del Ayuntamiento de Madrid.