La Policía desarticuló una rede de tráficu de cocaína qu'operaba n'Asturies

La Policía Nacional desarticuló ayeri una rede criminal dedicada al tráficu de cocaína n'Asturies. Siete de los doce miembros de la organización deteníos ingresaron en prisión. Na operación los axentes incautáronse de 46.800 euros y 1,6 kilos de cocaína que, en manipulándola, podría llegar al mercáu convertida en cerca de 10.100 dosis, según informó la Policía Nacional.

La investigación entamó a primeros d'esti añu cuando se detectó la presencia n'Asturies d'un grupu formáu por nacionales y colombianos que se dedicaben a la distribución de cocaína por toa Asturies, si bien el so radiu d'actuación 'comercial' asitióse nel oriente asturianu, sobremanera nos conceyos de Ribeseya, Cangues d'Onís, y l'oriente asturianu.

Dende l'entamu la investigación calificóse de "complexa", ya que se trataba d'una organización que respondía perfectamente a los parámetros apautaos pa considerase integrada dientro del Crime Organizáu, ello ye, taba compuesta por una pluralidá de persones, tenía una xerarquía bien afitada, existía un repartu de roles ente los miembros de la organización y desarrollaba la so actividá de manera estable y permanente nel tiempu. La dificultá tovía foi mayor, cuando se descubrío qu'esti grupu abastecíase de droga por aciu d'otros miembros de la organización de nacionalidá colombiana dende Madrid y Valencia.

Dende esi momentu, el principal oxetivu foi conocer la identidá de los principales suministradores y la manera en qu'introducíen la droga. Como midida de seguridá, la organización modificaba los mecanismos pa introducir la droga de manera frecuente, anque pudo determinase que'l métodu más utilizáu, yera al traviés de persones que facíen de 'correos' y que viaxaben col so equipaxe, bien aprovechando les llinies d'autobuses procedentes de Madrid y Valencia, bien en coches particulares de la organización. Dábase la circunstancia de qu'estos 'correos' yeren persones de nacionalidá colombiana pero residentes en Xixón.


Nel momentu de la detención d'ún destos 'tresportistes' inacutóse-y un paquete con un pesu d'un kilu de cocaína tapecíu nel inteiror del vehículu, pa lo cual profesionales policiales tuvieron que proceder práticamente al so desgüace.

Una vez identificaos y deteníos los correos, el siguiente pasu foi la detención de los suministradores principales y de los distribuidores llocales, vinculaos al mundu de la hostelería. Dientro de la rede figuren un español de 53 años, M.A.D., y el so fíu, A.M.D. de 28 años