La Pola Llaviana acueye practicantes de kárate nuevos y consagraos

L’alcuentru ye una oportunidá d’entrar na seleición española.

La Federación Asturiana de Karate, l’Equipu Nacional d’España y la Seleición d’Italia van participar nesti eventu nomáu Oxetivu Seleición, que se celebra esti fin de selmana en La Pola Llaviana y que va cuntar con más de 50 karateques de nivel internacional, como Ivan Lleal, Óscar Vázquez, Genaro Talarico y, en kata, Valentín Marcos Nieto. Tamién van poder participar tolos los deportistes federaos.

L’actividá fáise col envís d’incorporar promeses d’esti deporte al Equipu Nacional de Karate na modalidá reina: el kumite absolutu masculín. Coles mesmes, ofrez un espaciu d’alcuentru ente deportistes d’oríxenes, niveles y categoríes distintes, con sesiones abiertes.

La Real Federación Española de Karate va escoyer cerca de 40 competidores, de los que 16 van ser asturianos. Esti númberu de karateques va ser ampliáu por otros 10 deportistes d'élite, integrantes de la seleición Nacional d'Italia. El llavianés campeón del mundu, Valentín Marcos Nieto va facer una sesión de kata el sábadu 19 de marzu de 13:30h a 15:30 hores.